ایف آئی اے نے بڑی کارروائی کرتے ہوئے انسانی اسمگلنگ میں ملوث ایجنٹ کو گرفتار کرلیا، ملزم شہریوں کو غیر قانونی سمندر کے راستے لیبیا سے یورپ بھجوانے میں ملوث ہے۔

ترجمان کے مطابق ایف آئی اے ملتان کی جانب سے کارروائی کے دوران انسانی اسمگلنگ میں ملوث لینڈ روٹ ایجنٹ اجمل نواز کو شادمان کالونی گجرات سے گرفتار کرلیا گیا۔

ایف آئی اے نے بتایا کہ ملزم شہریوں کو غیر قانونی سمندر کے راستے لیبیا سے یورپ بھجواتا تھا، ملزم انسانی اسمگلنگ میں ملوث بین الاقوامی گینگ کا ایجنٹ ہے۔

یونان کشتی حادثہ، ایف آئی اے نے بڑی کارروائی کردی

ترجمان کا کہنا ہے کہ ملزم کو ملتان ائیرپورٹ پر آف لوڈ کئے گئے 5 مسافروں کی نشاندہی پر گرفتار کیا گیا، ملزم مسافروں کو یورپ بھجوانے کے نام پر لاکھوں روپے ہتھیانے میں ملوث ہے۔

ترجمان نے بتایا کہ گرفتار ملزم نے مسافروں کو عمرے ویزے پر سعودی عرب بھجوانے کی کوشش کی تھی، ملزم اس سے قبل بھی شہریوں کو سعودی عرب، دبئی اور باکو سے لیبیا بھجوانے میں ملوث رہا ہے۔

ایف آئی اے کے مطابق ملزم ساتھیوں کی مدد سے متاثرہ شہریوں کو کشتی کے ذریعے یورپ بھجوانے میں ملوث ہے، ملزم کے دیگر ساتھیوں کی گرفتاری کے لئے چھاپے مارے جارہے ہیں۔

ایف آئی اے کی کارروائی، جعلی ڈگری بنانے میں ملوث مرکزی ملزم گرفتار

ترجمان ایف آئی اے کا مزید کہنا تھا کہ یونان کشتی حادثے میں ملوث عناصر کے خلاف ملک بھر میں خفیہ اطلاعات پر کریک ڈائون جاری ہے۔