راولپنڈی کی انسداد دہشت گردی عدالت نے جی ایچ کیو حملہ کیس میں 2 مفرور ملزمان کے اشتہار جاری کرتے ہوئے انہیں 24 جنوری تک عدالت میں پیش ہونے کا حکم دے دیا۔

راولپنڈی کی انسداد دہشت گردی کے جج امجد علی شاہ نے دونوں مفرور ملزمان کے اشتہار جاری کیے، ملزمان میں شہیر سکندر اور محمد عاصم شامل ہیں۔

خصوصی عدالت کی جانب سے جاری کردہ اشتہار میں دونوں ملزمان کو 24 جنوری تک عدالت میں پیش ہونے کا حکم جاری کیا گیا ہے جبکہ ملزمان کے پیش نہ ہونے پر ان کو اشتہاری قرار دے دیا جائے گا

پراسیکوٹر سید ظہیر شاہ کا کہنا ہے کہ اشتہاری قراردینے کے بعد ملزمان کی جائیداد کی قرقی کا عمل بھی شروع کردیا جائے گا۔

جی ایچ کیو حملہ کیس میں عمران خان، عمر ایوب اور فواد چوہدری کی درخواستیں مسترد

کیس میں اب تک نامزد بانی پی ٹی آئی عمران خان سمیت 119 ملزمان میں سے 117 پر فرد جرم عائد کی جاچکی ہے۔

اس سے قبل، رواں ماہ 13 دسمبر کو انسداد دہشت گردی عدالت لاہور نے 9 مئی 2023 کو مسلم لیگ (ن) کا آفس جلانے کے مقدمے میں پاکستان تحریک انصاف (پی ٹی آئی) کے رہنماؤں میاں اسلم اقبال، حماد اظہر اور مراد سعید سمیت دیگر ملزمان کو اشتہاری قرار دے دیا تھا۔

انسداد دہشت گردی عدالت لاہور نے ملزمان کے دائمی ورانٹ گرفتاری بھی جاری کردیے۔

خیال رہے کہ 9 مئی کو القادر ٹرسٹ کیس میں بانی پاکستان تحریک انصاف عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔

مظاہرین نے لاہور میں کور کمانڈر کی رہائش گاہ پر بھی دھاوا بول دیا تھا جسے جناح ہاؤس بھی کہا جاتا ہے اور راولپنڈی میں واقع جنرل ہیڈکوارٹرز (جی ایچ کیو)کا ایک گیٹ بھی توڑ دیا تھا۔

جی ایچ کیو حملہ کیس: پی ٹی آئی رہنماؤں سمیت 25 ملزمان کے ناقابل ضمانت وارنٹ جاری

اس کے بعد ملک بھر میں قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی کے کارکنوں کے خلاف مقدمات بھی درج کیے گئے تھے۔