پاکستان نے 3 میچز کی ون ڈے سیریز کے دوسرے میچ میں جنوبی افریقا کو جیت کے لیے 330 رنز کا ہدف دیا ہے۔

کیپ ٹاؤن میں کھیلے جانے والے 3 ون ڈے میچوں کی سیریز کے دوسرے ایک روزہ میچ میں جنوبی افریقا نے ٹاس جیت کر پہلے پاکستان کو پہلے بیٹنگ کی دعوت دی اور پہلے بلے بازی کرتے ہوئے پاکستانی ٹیم 49.5 اوورز میں 329 رنز بناکر آؤٹ ہوئی۔

پاکستان کی اننگز

پاکستان کی جانب سے گرین شرٹس کی جانب سے اوپننگ بیٹر عبداللہ شفیق اور صائم ایوب نے اننگز کا آغاز کیا تو ابتدا میں ہی قومی ٹیم کو نقصان اٹھانا پڑا جب 5 کے مجموعی اسکور پر پہلی وکٹ گری، عبداللہ شفیق مسلسل دوسرے میچ میں ناکام رہے اور بغیر کوئی رن بنائے پویلین لوٹ گئے۔

اس کے بعد صائم ایوب اور بابر اعظم نے دوسری وکٹ پر 48 رنز کی شراکت داری قائم کی، گزشتہ میچ میں سینچری اسکور کرنے والے صائم ایوب 25 رنز بنا کر آؤٹ ہوئے۔

53 رنز پر 2 کھلاڑی آؤٹ ہونے کے بعد محمد رضوان اور بابر اعظم نے ٹیم کے اسکور کو آگے بڑھایا، دونوں کھلاڑیوں نے پر اعتماد بیٹنگ کی اور نصف سینچریاں اسکور کی، بابر اعظم نے کریئر کی 33 ویں اور محمد رضوان نے 14ویں ففٹی اسکور کی۔

بابر اعظم 73 رنز اور محمد رضوان 80 رنز بنا کر آؤٹ ہوئے، دونوں نے مل کر ٹیم کے اسکور کو 200 رنز کے قریب پہنچایا۔

اس کے بعد آغا سلمان اور کامران غلام نے بھی جارحانہ بلے بازی کی، آغا سلمان 30 اور کامران غلام 32 گیندوں پر 63 رنز بنا کر آؤٹ ہوئے، ان کی اننگز میں 5 چھکے اور 4 چوکے شامل تھے۔

اس کے علاوہ عرفان خان نے 15، شاہین آفریدی نے 16، حارث رؤف نے 6، ابرار احمد نے 4 رنز بنائے جبکہ نسیم شاہ صفر پر ناٹ آؤٹ پویلین لوٹے۔

جنوبی افریقا کی جانب سے ڈیبیو کرنے والے کوینا مافاکا نے 4 کھلاڑیوں کو آؤٹ کیا جبکہ مارکو جینسن نے 3، ژورن فورٹن اور اینڈائل فیلوکوایا نے 1، 1 وکٹ حاصل کی۔

میچ کا ٹاس

جنوبی افریقا کے دارالحکومت کیپ ٹاؤن میں کھیلے جانے والے دوسرے ایک روزہ میچ میں پروٹیز کپتان ٹیمبا باووما نے ٹاس جیت کر پہلے بولنگ کا فیصلہ کیا، پہلے میچ میں آرام کرنے والے باووما کی ٹیم میں واپسی ہوئی ہے۔

ٹاس کے موقع پر گفتگو کرتے ہوئے جنوبی افریقا کے کپتان ٹیمبا باووما نے کہاکہ ہم پاکستانی ٹیم کو کم اسکور تک محدود کرنے کی کوشش کریں گے۔

اس موقع پر بات چیت کرتے ہوئے پاکستان کرکٹ ٹیم کے کپتان محمد رضوان نے کہاکہ پہلے میچ میں جیت پر بے حد خوش ہے، ہم کوشش کریں گے کہ مخالف ٹیم کو اچھا ٹارگٹ دے سکیں۔

پاکستان کی پلیئنگ الیون

پاکستان کی پلیئنگ الیون میں محمد رضوان (کپتان)، بابر اعظم، صائم ایوب، عبداللہ شفیق، کامران غلام، سلمان علی آغا، محمد عرفان خان، شاہین شاہ آفریدی، نسیم شاہ، حارث رؤف، ابرار احمد شامل ہیں۔

جنوبی افریقا کی پلیئنگ الیون

جنوبی افریقا کی پلیئنگ الیون میں ٹیمبا باووما (کپتان)، ایدن مارکرم، ٹونی ڈی زورزی، ڈیوڈ ملر، راسی وینڈر ڈوسن، ہنرک کلاسن، مارکو جانسن، بیورن فورچون،کیوین مافاکا، تبریز شمسی شامل ہیں۔

گرین شرٹس نے ٹیم میں کوئی تبدیکلی نہیں کی اور وننگ کمبینیشن کو برقرار رکھا ہے جبکہ جنوبی افریقا نے 4 تبدیلیاں کی ہیں، میزبان ٹیم کی جانب سے کیوین مافاکا آج ون ڈے کرکٹ میں اپنا (ڈیبیو) پہلا میچ کھیلیں گے۔

خیال رہے کہ پاکستان نے پہلے ون ڈے میچ میں جنوبی افریقہ کو سنسنسی خیز مقابلے کے بعد تین وکٹوں سے شکست سے دوچار کیا تھا، قومی ٹیم نے 240 رنز کا ہدف 7 وکٹوں کے نقصان پر آخری اوور میں حاصل کیا تھا۔

قومی ٹیم نے نوجوان بلے باز صائم ایوب کی سینچری اور نائب کپتان آٖغا سلمان کی آل راؤنڈ کارکردگی کی بدولت میچ میں فتح حاصل کی تھی، 3 ایک روزہ میچوں کی سیریز میں پاکستان کو 0-1 کی برتری حاصل ہے۔

واضح رہے کہ پاکستان کرکٹ ٹیم 10 دسمبر سے 7 جنوری تک جنوبی افریقا کے دورے میں 3 ٹی20، 3 ون ڈے اور 2 ٹیسٹ میچز کھیلے گی۔

پاکستان اور جنوبی افریقہ کے مابین پہلا ون ڈے 17 دسمبر کو کھیلا گیا، دونوں ٹیموں کے درمیان تین ون ڈے میچز پر مشتمل سیریز کھیلی جائے گی جبکہ ٹیسٹ میچز بالترتیب 26 دسمبر اور 3 جنوری کو سنچورین اور کیپ ٹاؤن میں شروع ہوں گے۔