بلوچستان میں منفی درجہ حرارت کے باعث سوئی سدرن گیس (ایس ایس جی سی) کی پائپ لائن جم گئی، جس سے کوئٹہ سمیت صوبے کے مختلف علاقوں میں گیس کی سپلائی متاثر ہوگئی۔

ایس ایس جی سی کے ترجمان کا کہنا ہے کہ اٹھارہ انچ قطر کی لائن پر نصب کنٹرولرز آئسنگ کے باعث منجمد ہو گئے، پائپ لائن سیٹ 130 کی بجائے 20 پی ایس آئی جی پر کام کر رہی ہے۔

ترجمان نے بتایا کہ سوئی سدرن کی تکنیکی ٹیمیں صبح چھ بجے سے اس پر کام کر رہی ہیں۔

متاثرہ علاقوں میں کوئٹہ شہر کے حصے، نواں کلی، پشین، کچلاک، بوستان اور زیارت کے علاقے شامل ہیں۔

دوسری جانب محکمہ موسمیات کا کہنا ہے کہ بلوچستان کے بیشتر اضلاع میں موسم سرد اور خشک رہے گا۔

محکمہ موسمیات کے مطابق ملک کے بیشتر علاقوں میں موسم سرد اور خشک رہنے کی توقع ہے، اسلام آباد اور گردونواح میں موسم سرد اور مطلع ابر آلود رہنے کا امکان ہے۔

پنجاب کے بیشتر اضلاع میں بھی موسم سرد اور خشک رہے گا، خیبرپختونخوا کے بیشتر اضلاع میں موسم سرد اور پہاڑوں پر برفباری متوقع ہے۔

سندھ کے بیشتر اضلاع میں موسم سرد اور خشک جبکہ کشمیر اور گلگت بلتستان میں موسم شدید سرد اور مطلع ابرآلود رہنے کا امکان ہے۔