پاکستان تحریک انصاف (پی ٹی آئی) نے ’فوج کو سیاست میں گھسیٹنے کی حکومتی کوششوں‘ کی شدید مذمت کرتے ہوئے اسے شرمناک اور قابل مذمت قرار دیا ہے۔

پارٹی نے عمران خان کے نام سے سابق فوجی اہلکار جنرل فیض حمید کو نشانہ بنانے کی کوششوں کو بھی مسترد کر دیا۔

واضح رہے کہ سابق ڈی جی آئی ایس آئی لیفٹیننٹ جنرل (ر) فیض حمید کے خلاف کورٹ مارشل کی کارروائی کے اگلے مرحلے کا آغاز ہو گیا، جس میں سابق ڈی جی آئی ایس آئی لیفٹیننٹ جنرل (ر) فیض حمید کو باضابطہ طور پر شارج شیٹ کردیا گیا۔

عطا اللہ تارڑ اور فیصل واوڈا جیسی سیاسی شخصیات کے ریمارکس پر ردعمل دیتے ہوئے پی ٹی آئی کے ترجمان نے کہا کہ حکومت کے اقدامات پاکستان کی مسلح افواج کی ساکھ کو نقصان پہنچا رہے ہیں۔

’سیاسی سرگرمیوں‘ میں حصہ لینے پر لیفٹیننٹ جنرل (ر) فیض حمید کو چارج شیٹ کردیا گیا

پی ٹی آئی کے ترجمان نے کہا کہ فوج کو سیاسی تنازعات میں ملوث کرنے کی حکومتی کوششیں نہ صرف شرمناک ہیں بلکہ ہماری مسلح افواج کے امیج کے لیے بھی نقصان دہ ہیں۔

انہوں نے مزید کہا کہ ڈائریکٹر جنرل انٹر سروسز پبلک ریلیشنز (آئی ایس پی آر) سے اس معاملے کی وضاحت اور حقائق عوام کے سامنے پیش کرنے کے لیے فوری ردعمل کا مطالبہ کیا گیا۔

پی ٹی آئی نے روشنی ڈالی کہ گزشتہ ڈھائی سالوں میں ریاستی حمایت یافتہ شخصیات کی جانب سے بے بنیاد بیانیے کا پرچار کیا گیا اور جھوٹے الزامات لگائے گئے۔

ترجمان نے مزید کہا کہ ”متعدد اشتعال انگیزیوں کے باوجود، پی ٹی آئی نے ہمیشہ فوج کو سیاست سے الگ رکھا ہے، اور ہم نے اسے سیاسی فائدے کے لیے استعمال کرنے سے گریز کیا ہے۔“

بیان میں بعض سرکاری عہدیداروں پر بھی تنقید کی گئی، انہیں ”اسٹیبلشمنٹ کی کٹھ پتلی“ قرار دیتے ہوئے، ان پر ذاتی سیاسی فائدے کے لیے فوج کی شبیہہ کو خراب کرنے کا الزام لگایا گیا۔

پی ٹی آئی نے غیرجانبداری کے حوالے سے سابق فوجی سربراہ قمر جاوید باجوہ کے دعووں پر بھی تشویش کا اظہار کیا، جن کا ان کا کہنا تھا کہ ان ریاستی شخصیات کی وجہ سے انہیں نقصان پہنچایا جا رہا ہے۔

عمران خان کی جماعت نے فیض حمید کو مبینہ طور پر سیاسی نشانہ بنانے کے معاملے پر بھی توجہ دلائی اور کہا کہ اس طرح کے اقدامات ناقابل قبول ہیں۔ پی ٹی آئی کے ترجمان نے کہا کہ فیض حمید یا کسی اور شخص کے نام سے عمران خان کو نشانہ بنانے کی کوشش قوم کبھی قبول نہیں کرے گی۔

پی ٹی آئی نے مزید مطالبہ کیا کہ اگر فیض حمید کی عسکری معاملات میں مداخلت اندرونی ہے تو عسکری قیادت ادارے کی ساکھ کو نقصان پہنچانے والے اہلکاروں کے خلاف سخت کارروائی کرے۔ ترجمان نے کہا کہ سیاسی انتقام کے تحت اٹھائے گئے ہر قدم کو بے نقاب کیا جائے گا اور آخر کار حق اور انصاف کی فتح ہوگی۔