امرود پھل یا طاقت کا بے بہا خزانہ؟ امرود دو قسم کا ہوتا ہے ایک اندر سے سفید اور دوسرا سرخ ہوتا ہے، کچے امرود کا رنگ سبز اور پختہ امرود زرد سفیدی مائل اور خوشبودار ہوتا ہے۔

امرود کے بے شمار فوائد امرود قوت ہاضمہ کو تقویت دیتا ہے، اس کا کھانا مفرح ہوتا ہے،کچا امرود قابض ہوتا ہے جبکہ پکا ہوا کھانے کے بعد ملین ہوتا ہے، یہ دل کو طاقت دیتا ہے، امرود دماغ کو تر رکھتا ہے، مالیخولیا اور ذہنی پریشانی کو دور کرتا ہے۔

یہ بہترین بھوک بڑھاتا ہے، زکام اور بواسیر میں بے حد مفید ہے، اس کے بیج پیٹ کے کیڑوں کے قاتل ہیں، اس کے پتے رگڑ کر پلانے سے دست کی بیماری ٹھیک ہوجاتی ہے، اس کے پھولوں کا لیپ آنکھوں کے ورم کیلئے بے حد مفید ہوتا ہے۔

امرود میں کیا کیا ہوتا ہے؟ اس میں وٹامن اے اور سی کے علاوہ کیلشیم، لوہا اور فاسفورس ہوتے ہیں جو انسانی صحت میں بڑا اہم کردار ادا کرتے ہیں۔

امرود کی چھال کا جوشاندہ بنا کر غرارے کرنے سے مسوڑھوں کے جملہ امراض ٹھیک ہوتے ہیں، اگر پھٹکری کے ہمراہ امرود کے پتوں کو رگڑ کر جوشاندہ تیار کرکے کلیاں کی جائیں تو دانتوں کے درد کو فوراً فائدہ ہوتا ہے۔

اس پھل کے پتے رگڑ کر جلی ہوئی جگہ پر لگانے سے جلن ختم ہوتی ہے اور چھالے نہیں بنتے، متواتر استعمال سے جلد آرام آجاتا ہے، امرود طبیعت کو نرم کرتا ہے اور خون کو صاف کرتا ہے۔

اس کے پھول رگڑ کر پینے سے (چھان کر) پتے کی پتھری ٹھیک ہوتی ہے بشرطیکہ مرض بڑھا ہوا نہ ہو، امرود کے خشک پتوں کا سفوف زخموں کو خشک کرتا ہے۔

کمزور معدہ کا علاج ضعف معدہ کیلئے اگر ایک سیر کچے امرود میں ڈیڑھ سیر پانی ملا کر اتنا پکایا جائے کہ وہ گل جائیں بعد میں کپڑے میں ڈال کر اچھی طرح سے پانی نچوڑیں ، اس پانی میں تین پاؤ چینی ملا کر شربت تیار کریں، دو چمچ بڑے ایک گلاس پانی میں ملا کر پینا ضعف معدہ کے لئے بے حد مفید ہے۔

اگر سرچکرا رہا ہو تو امرود کے تازہ پتے ایک تولہ لے کر انہیں ایک سیرپانی میں جوش دے کر چھان لیں اور اس میں آدھا تولہ نمک ملا کر خالی پیٹ دن میں ایک یا دو دفعہ استعمال کرنے سے فائدہ ہوتا ہے۔

کھانسی اور نزلہ کیسے دور کرتا ہے؟ کھانسی اور نزلہ کو دور کرنے کے لیے آدھا کچا امرود جسے گدرا بھی کہتے ہیں ، گرم راکھ میں دبا کر تھوڑی دیر کے بعد نکال کر صاف کرکے تھوڑا نمک ملا کر کھانے سے کھانسی اور نزلہ سے یقیناً آرام ہوجاتا ہے۔

نزلے کو روکنے کے لیے امرود کی نرم کونپلیں آٹے کے چھان کے ساتھ جوشاندہ بنا کر تھوڑی چینی ملا کر پینے سے فوراً فائدہ ہوتا ہے، امرود خون کی حدت کو دور کرتا ہے، مثانہ کی سوزش کو دور کرتا ہے۔

اسی طرح بلغم روکنے کے لیے امرود کے ساتھ اجوائن دیسی ملا کر کھانا مفید ہوتا ہے، امرود اور اجوائن دیسی ملا کر کھانے سے آنکھوں کے آگے اندھیرا، سرکا گھومنا بھی ٹھیک ہوجاتا ہے۔

معدے کی تیزابیت کا دشمن امرود معدے کی تیزابیت کا دشمن ہوتا ہے، پیٹ کی بے شمار بیماریوں میں امرود کا استعمال مفید ہوتا ہے، امرود خود ہاضم ہوتا ہے اور دوسری غذاؤں کو ہضم کرنے میں مدد دیتا ہے، امرود کے استعمال سے آنتیں صاف ہوجاتی ہیں، جگر کا فعل امرود کھانے سے درست ہوجاتا ہے۔

امرود پیاس کی شدت کو کم کرتا ہے؟ امرود پیاس کی شدت کو کم کرتا ہے، رات کو منہ میں پانی آنے کی شکایت بھی امرود کے مسلسل استعمال سے ٹھیک ہوجاتی ہے،امرود کھانے سے کھانا زیادہ بہتر ہضم ہوتا ہے مگر امرود کھانے کے بعد پانی کم از کم ایک گھنٹے بعد پیا جائے تو بہتر ہے۔

قدرتی پھل سے پیٹ کا اپھارہ دور ہوتا ہے بشرطیکہ مقدار کے مطابق کھایا جائے، امرود بواسیری قبض کو بھی دور کرتا ہے۔

دائمی قبض دور کرنے کیلئے صبح ناشتے میں آدھ پاؤ سے تین پاؤ تک امرود کالی مرچ اور نمک چھڑک کر کھانا مفید ہے، امرود کے بیج آنتوں میں رکے ہوئے زہریلے اجزاء کو خارج کرتے ہیں، امرود کو صرف سونگھنا ہی متلی کو دور کرتا ہے۔

امرود گردے کی پتھری کو توڑتا ہے، منہ کی سوجن دور کرنے کے لیے اس کے پتوں کو ایک سیر پانی میں جوش دے کر غرارے کرنا مفید ہے، ہیضے والے کو امرود کے پتوں کا جوشاندہ پلانے سے قے اور دست بند ہوجاتے ہیں۔