اپوزیشن لیڈرعمرایوب نے اپنی گرفتاری کے خلاف پشاور ہائیکورٹ میں توہین عدالت کی درخواست دائر کر دی ہے۔

واضح رہے کہ دو روز قبل عمرایوب سمیت دیگر پانچ پی ٹی آئی رہنماوں کو بیل آرڈر ہونے کے باوجود گرفتار کرلیا گیا تھا جس کے بعد عدالت نے ان کی رہائی کا حکم دیتے ہوئے پانچ افسران کو توہین عدالت کا نوٹس جاری کردیا تھا۔

بعدازاں عمر ایوب نے اس کی ذمہ داری شہباز شریف، مریم نواز، محسن نقوی اور آئی جی پنجاب پر ڈالی تھی۔

اب اس معاملے پر عمرایوب نے توہین عدالت کی درخواست دائر کرتے ہوئے اس میں وزیر داخلہ محسن نقوی ، آئی جی پنجاب اور ڈی پی او اٹک کو فریق بنایا ہے۔

انسداد دہشتگری عدالت کا عمرایوب اورراجہ بشارت کی رہائی کا حکم

عمر ایوب نے درخواست میں کہا ہے کہ انہیں پشاور ہائیکورٹ سے ضمانت حاصل تھی، پھر بھی انہیں سفری ضمانت کے باوجود اڈیالہ جیل کے باہر سے گرفتار کیا گیا۔ انہوں نے مزید یہ بھی دعویٰ کیا کہ انہیں حبس بے جا میں رکھا گیا۔

درخواست میں استدعا کی گئی ہے کہ فریقین کے خلاف توہین عدالت کی کارروائی کی جائے۔