ملک کے شمالی علاقوں اور بلوچستان میں موسلا دھاربارش اور برفباری سے سردی مزید بڑھ گئی، سوات، وادی کالام، وادی کاغان اور بالاکوٹ کے پہاڑ روئی کے سفید گالوں سے ڈھک گئے ہیں۔

بلوچستان کے مختلف علاقوں میں بارش اور برفباری سے سردی میں اضافہ ہوگیا، کوئٹہ میں اس وقت سرد ہواؤں کا راج ہے جبکہ کراچی میں رات اور صبح کے اوقات میں خنکی میں اضافہ ہوگیا ہے۔

محکمہ موسمیات کے مطابق آج شمال مشرقی بلوچستان، بالائی خیبرپختونخوا اور آزاد کشمیر میں بارش اور پہاڑوں پر برفباری کا امکان ہے تاہم ملک کے بیشتر علاقوں میں موسم خشک اور سرد رہے گا۔

ملک بھر میں بارش سے موسم مزید سرد، برفباری کے باعث راستے بند، سیاحوں کو روک دیا گیا

اس کے علاوہ پنجاب کے میدانی علاقوں اور بالائی سندھ میں ہلکی دُھند چھائے رہنے کی توقع ہے۔

پی ڈی ایم اے کا بارش اور برفباری سے نمٹنے کیلئے پلان تیار

دوسری جانب بلوچستان کے محکمہ پی ڈی ایم اے نے موسم سرما کے دوران برف باری اور بارش سے نمٹنے کے لیے پلان تیار کرلیا ۔

ڈائریکٹر جنرل پی ڈی ایم اے بلوچستان جہاں زیب خان نے بتایا کہ موسم سرما کی آمد کے ساتھ ہی محکمے نے اپنی تیاریاں مکمل کرلی ہیں، تمام محکموں کے ساتھ مل کر برف باری اور بارش سے نمٹنے کے لیے پلان بنالیا ہے۔

انہوں نے بتایا کہ قلعہ سیف اللّٰہ کے علاقے کان مترزئی میں قومی شاہراہ پر ریلیف کیمپ فعال کردیا ہے، جہاں برف صاف کرنے والی مشینری پہنچا دی گئی ہے اور ریلیف میں حصہ لینے والے عملے کو تعینات کردیا گیا ہے۔

کراچی میں بھی سرد ہواؤں کی انٹری، ملک کے بالائی اضلاع میں کڑاکے کی سردی

محکمہ پی ڈی ایم اے محکمہ موسمیات کے ساتھ رابطے میں ہے، برف باری کی صورتحال معلوم ہوتے ہی لکپاس، کولپور، شیلا باغ اور زیارت میں برف صاف کرنے والی مشینری روانہ کردی جائے گی۔