بلوچستان اسمبلی کے حلقہ پی بی 8 سبی میں ضمنی انتخاب کے لیے پولنگ کا عمل جاری ہے، لوگ بڑی تعداد میں اپنے رائے دہی استعمال کرنے کے لئے پولنگ اسٹیشن آرہے ہیں، پولنگ کے دوران سیکیورٹی کے سخت انتظامات کیے گئے ہیں ۔

الیکشن کمیشن کے مطابق حلقہ پی بی 8 سبی میں پولنگ کا آغاز صبح 8 بجے ہوا جو بغیر کسی وقفے کے شام 5 بجے تک جاری رہے گی، ضمنی انتخابات میں 22 امیدوار حصہ لے رہے ہیں۔

ضمنی انتخابات میں کل ووٹرز کی تعداد ایک لاکھ 16 ہزار 161 ہے، جس میں 64 ہزار 223 میل ووٹرز اور 51 ہزار 938 فی میل ووٹرز ہیں۔

ضلع بھر میں پولنگ اسٹیشنز کی تعداد 124 ہے، جس میں 52 مرد، 43 خواتین اور 29 مشترکہ پولنگ اسٹیشن بنائے گئے ہیں جبکہ 124 پولنگ اسٹیشنوں میں سے 67 حساس اور 57 کو انتہائی حساس قرار دیا گیا ہے۔

پولنگ بوتھ کی تعداد 342 ہے، جس میں 187 مرد اور 155خواتین کے لیے قائم کیے گئے ہیں، ربن پولنگ کی تعداد 41 جبکہ رورل پولنگ کی تعداد 81 ہے۔

پولنگ کے دوران امن وامان کو برقرار رکھنے کے لیے سیکیورٹی کے سخت انتظامات کیے گئے ہیں۔

پیپلز پارٹی کے امیدوار سردار کوہیار خان ڈومکی اور آزاد امیدوار میر اصغر مری کے درمیان کانٹے کا مقابلہ متوقع ہے جبکہ الیکشن میں پی ٹی آئی کے امیدوار سردار ولی محمد مرغزانی اور پشتون خواہ کے سید نور احمد شاہ بھی حصہ لے رہے ہیں۔