کراچی سمیت سندھ کے 18 اضلاع میں ضمنی بلدیاتی انتخاب کیلئے پولنگ کا وقت ختم ہوچکا ہے اور اب حتمی نتائج کا انتظار ہے، آج کراچی کے 6 اضلاع اور ایک کنٹونمنٹ بورڈ میں انتخابی میدا سجا۔ 10 بلدیاتی نشستوں پر امیدوار میدان میں ہیں، جن میں ضلع جنوبی، غربی، وسطی، کیماڑی، ملیر اورکنٹونمنٹ بورڈ کورنگی شامل ہیں۔

الیکشن کمیشن کے قوائد کے مطابق وقت ختم ہونے کے بعد صرف پولنگ اسٹیشن میں موجود افراد اپنا ووٹ کاسٹ کرسکیں گے۔

آج کل 77 نشستوں میں سے 41 نشستوں کے لیے پولنگ ہوئی ہے، 32 نشستوں پر پہلے ہی امیدوار بلامقابلہ کامیاب قرار پائے ہیں۔

کراچی کی 10، حیدرآباد کی 5، نواب شاہ اور اسکرنڈ کی 4، سکھر اور ٹنڈو محمد خان کی 2،2، ٹندوآلہ یار اور گھوٹکی کی 1،1 نشست پر الیکشن ہوئے، اس کے علاوہ لاڑکانہ، قمبر شہداد کوٹ، شکارپور، جیکب آباد، نوشہرو فیروز، میرپور خاص، مٹیاری اور ٹھٹھہ کی بھی ایک ایک بلدیاتی نشست پر الیکشن ہوئے۔

کراچی کے 6 اضلاع سے 85 جبکہ دیگر 14اضلاع سے 303 امیدوار میدان میں ہیں تاہم 4 نشستیں درست کاغذات جمع نہ کرانے پر اب بھی خالی ہیں۔

الیکشن کمیشن کے مطابق، صوبے میں 274 پولنگ اسٹیشنز میں سے 213 کو انتہائی حساس اور 50 کو حساس قرار دیا گیا تھا۔

ضمنی بلدیاتی انتخابات کے لیے سیکیورٹی کے سخت انتظامات کیے گئے تھے۔

کراچی میں 10 بلدیاتی نشستوں کے لیے میدان سج گیا

کراچی میں 4 چیئرمین، 2 وائس چیئرمین اور 4 کونسلرز کی نشستوں پر پولنگ ہوئی۔

کراچی میں 10 بلدیاتی نشستوں کے لیے 167 پولنگ اسٹیشنز بنائے گئے، جن میں سے 136پولنگ اسٹیشنز کو انتہائی حساس اور 26 کو حساس قرار دیا گیا۔

پولنگ بوتھس کی مجموعی تعداد 618 تھی، 10 بلدیاتی حلقوں میں ووٹرز کی کل تعداد 2 لاکھ 95 ہزار 491 ہے، ایک لاکھ 57 ہزار 617 مرد اور ایک لاکھ 37 ہزار 874 خواتین ووٹرز ہیں۔

کراچی میں 10 بلدیاتی اور ایک کنٹونمنٹ بورڈ کی نشست پر انتخابات ہوئے ہیں۔ کراچی میں 4 چیئرمین، 2 وائس چیئرمین اور 4 وارڈ ممبر کی نشستوں کے لیے پولنگ ہوئی ہے۔

10 بلدیاتی نشستوں کے لیے مجموعی طور پر 68 امیدوار بیلٹ پیپر پر موجود تھے۔ ملیر ٹاؤن یو سی 9 کے چیئرمین کے لیے 5 امیدوار میدان میں تھے۔

ابراہیم حیدری ٹاؤن یو سی 7 وارڈ 4 کے لیے 5 امیدواروں کے درمیان مقابلہ ہوا جبکہ لانڈھی ٹاؤن کی یو سی 6 کے وائس چیئرمین کے لیے 8 امیدوار مدمقابل رہے۔

ماڈل کالونی ٹاؤن یو سی 7 کے چیئرمین کے لیے 12 امیدوار میدان میں اترے، کورنگی ٹاؤن یو سی 7 کے وارڈ ایک پر 7 امیدواروں کے درمیان مقابلہ ہوا۔

صدر ٹاؤن کی یو سی 13 کے چیئرمین کے لیے 7 امیدوار مدمقابل تھے۔ منگھوپیر ٹاؤن کی یو سی 5 کے وارڈ 4 پر 5 امیدوار بیلٹ پیپر پر موجود تھے۔

گلبرگ ٹاؤن یو سی 5 کے وائس چیئرمین کے لیے 6 امیدوار میدان میں تھے۔ لیاقت ٹاؤن یو سی 7 کے چیئرمین کے لیے 8 امیدوار مدمقابل تھے جبکہ بلدیہ ٹاؤن کی یو سی 10 کے وارڈ 4 میں 5 امیدواروں کے درمیان مقابلہ ہوا۔

ضمنی انتخابات کی وجہ سے یوسی 13 ضلع ساؤتھ میں چھٹی دی گئی۔ ڈپٹی کمشنر ضلع ساؤتھ نے چھٹی کا نوٹیفکیشن جاری کیا۔

انتہائی حساس پولنگ اسٹیشنوں پر سی سی ٹی وی کیمرے نصب کیے گئے، انتہائی حساس پولنگ اسٹیشن پر 16 سے 18 اہلکار تعینات کئے گئے۔

حساس پولنگ اسٹیشنوں پر 8 سے 12 پولیس اہلکار تعینات کیے گئے ، پولنگ اسٹیشنز پر پولیس اور رینجرز کی نفری تعینات کی گئی۔

ضمنی بلدیاتی انتخابات کے باعث کیماڑی اور کورنگی میں چھٹی کا اعلان

کراچی میں ضمنی بلدیاتی انتخابات کے باعث کیماڑی اور کورنگی میں چھٹی کا اعلان کیا گیا۔

ڈپٹی کمشنر کا کہنا تھا کہ ووٹرز کی سہولت کے لیے چھٹی کا اعلان کیا گیا ہے، یونین کمیٹی 5 یوسف گوٹھ، منگھوپیر ٹاؤن میں بھی عام تعطیل ہے۔

ڈپٹی کمشنر ضلع غربی اور ڈسٹرکٹ ریٹرننگ افسر نے بھی عام تعطیل کا حکم نامہ جاری کیا، فیصلے کا مقصد ووٹرز کو حق رائے دہی کے لیے سہولت فراہم کرنا تھا۔