پاکستان میں کم از کم تنخواہ ایک ہزار ڈالرکے برابر کرنے کی درخواست لاہور ہائیکورٹ میں دائر کر دی گئی۔

درخواست فہمید نواز ایڈووکیٹ کی جانب سے لاہور ہائیکورٹ میں دائر کی گئی ہے، درخواست میں انہوں نے وزیراعظم اور تمام وزرائے اعلیٰ کو فریق بنایا ہے۔

درخواست میں مؤقف اختیار کیا گیا کہ یہ تصدیق شدہ بات ہے کہ پاکستان میں ہر جگہ غربت ہے، پاکستان میں کم از کم تنخواہ 37 ہزار روپے ماہانہ ہے۔

درخواست میں کہا گیا کہ عدالت برطانیہ کے 1950 لیبر قوانین کی پاکستان میں نفاذ کیلئے مداخلت کرنی چاہیئے، پاکستان میں 32 لاکھ سرکاری اور تقریباً سات آٹھ کروڑ پرائیویٹ ملازمین ہیں۔

فہمید نواز ایڈووکیٹ نے درخواست میں مزید کہا کہ تنخواہوں میں اضافے سے شہریوں کی قوت خرید بڑھے گی، قوت خرید میں اضافے سے عالمی سرمایہ کاری پاکستان میں آئے گی اور معیشت میں ایک ہزار سے بارہ سو ارب ڈالر کا اضافہ ہوگا، پاکستان کے لیبر قوانین میں فوری ترامیم کی ضرورت ہے۔

درخواست میں استدعا کی گئی کہ عدالت برطانیہ کے 1950 لیبر قوانین کی پاکستان میں نفاذ کے لیے ایکشن لے اور پاکستان میں ایک ہزار ڈالر کے برابر ماہانہ تنخواہ مقرر کرنے کا حکم دے۔