لاہور کے علاقے شاہدرہ سگیاں پل پر ہوئے تہرے قتل کیس میں اہم پیش رفت ہوئی ہے، مقتول صفدر اور اس کے بیٹوں کا قاتل اس کا سگا بھائی اور بھتیجے نکلے۔ پولیس کے مطابق مقتول صفدر کا اپنے بھائی عبد الغفور سے جائیداد کا تنازعہ تھا۔

ہفتہ کو لاہور کے سگیاں پل پر افسوسناک واقعہ پیش آیا، جہاں پیشی پر عدالت کے لیے جانے والے باپ اور اس کے دو بیٹوں کو فائرنگ کر کے قتل کر دیا۔

پولیس کا کہنا ہے کہ باپ اور دو بیٹے پیشی پر عدالت جا رہے تھے کہ راستے میں ملزمان نے سگیاں پل پر انہیں فائرنگ کا نشانہ بنایا۔

عارف والا میں زمین کے تنازع پر پوتے نے دادا کو قتل کردیا

پولیس نے بتایا تھا کہ مقتولین کی مخالفین سے دشمنی چلی آ رہی ہے، مقتولین کی شناخت صفدر، یاسر صفدر، ناصر صفدر کے ناموں سے ہوئی ہے۔

پولیس کا مزید کہنا تھا کہ مقتولین رکشے میں سوار ہو کر عدالت جا رہے تھے جبکہ فائرنگ کرنے والے افراد موٹر سائیکل پر سوار تھے، پولیس نے واقعے کا مقدمہ درج کر کے تحقیقات شروع کردیں۔

اس دوران انکشاف ہوا کہ مقتول صفدر اور اس کے بیٹوں نے 2015 میں عبدالغفور کے بیٹے افضل کو قتل کیا تھا، بدلہ لینے کیلئے عبدالغفور اور اس کے بیٹوں نے آج حملہ کیا۔

پولیس کے مطابق قتل کا مقدمہ عبدالغفور کے بیٹوں کے خلاف درج کیا جا رہا ہے، ملزمان کی گرفتاری کیلئے 3 ٹیمیں تشکیل دی گئی ہیں، ملزمان اپنے گھروں کو تالا لگا کر فرار ہو چکے ہیں۔

مقتولین کی لاشیں حوالے نہ کئے جانے پر لواحقین جی پی او چوک پر احتجاجاً بیٹھ گئے، جس سے ٹریفک کی ایک سائیڈ رک گئی۔

مظاہرین کا کہنا ہے کہ مقتولین کے پوسٹمارٹم میں انتظامیہ جان بوجھ کر تاخیر کر رہی ہے۔

پولیس بھی مظاہرین منتشر کرنے کے لیے پہنچ گئی ہے۔