پاکستان پیپلز پارٹی کے رہنما منظور وسان کا کہنا ہے کہ مستقبل میں کسی نہ کسی طرح بلاول بھٹو کو وزیرِ اعظم بنتا دیکھ رہا ہوں۔

خیرپور میں میڈیا سے گفتگو کرتے ہوئے منظور وسان نے کہا کہ 27 ویں آئینی ترمیم میں جے یو آئی پیپلز پارٹی کا ساتھ دے گی، پہلے بھی جے یو آئی نے ساتھ دیا ہے۔

انہوں نے کہا کہ مستقبل میں بلاول بھٹو زرداری کو وزیراعظم دیکھ رہا ہوں، پی ٹی آئی والے پہلے بھی لڑتے رہے ہیں لیکن فائدہ انہیں ابھی تک نہیں ہوا ہے، ہم لڑائی کرنے والے لوگ نہیں ہیں، امن و امان کی خواہشات رکھنے والے ہیں۔

منظور وسان کا کہنا ہے کہ پی ٹی آئی والوں میں اندرونی اختلافات ہیں، آپس میں ان کی نہیں بنتی، آگے چل کر پی ٹی آئی ٹوٹ پھوٹ کا شکار ہو جائے گی اور اس میں دھڑے بندی ہو گی، جب تک بانی پی ٹی آئی جیل کے اندر ہیں بشری بی بی اور ان کی پارٹی مشکل میں ہے۔

پیپلز پارٹی کے رہنما نے یہ بھی کہا کہ 18 ویں ترمیم میں بھی وہی شرطیں تھیں جو موجودہ 26 ویں ترمیم میں ہیں۔