وزیر اعلیٰ پنجاب مریم نواز نے کہا ہے کہ اس بار کسانوں سے گندم نہ خریدنے پر انہیں اپنے اور غیر جانب داروں کی جانب سے بلا تفریق تنقید کا سامنا کرنا پڑا۔

حافظ آباد میں کسان کارڈ کی افتتاحی تقریب سے خطاب کرتے ہوئے انہوں نے وضاحت کی کہ یہ غلط فہمی ہے کہ حکومت کسانوں سے گندم خریدتی ہے؛ درحقیقت، آڑھتی گندم خریدتا ہے اور اسے مہنگے داموں حکومت کو فروخت کرتا ہے۔

انہوں نے مزید کہا کہ ”مجھے عوام کی روٹی کا خیال رکھنا ہے، لیکن ساتھ ہی کسان بھائیوں کا بھی خیال کرنا ہے۔“ ان کا مقصد ایسی پالیسیاں بنانا ہے جو کسانوں کو نقصان نہ پہنچائیں، اور کسان کارڈ اس کا ایک اہم حصہ ہے۔

مریم نواز نے کسان کارڈ کے فوائد پر روشنی ڈالتے ہوئے کہا کہ اس کے ذریعے وہ براہ راست کسانوں تک پہنچ رہی ہیں، جس میں کوئی مڈل مین یا آڑھتی شامل نہیں ہوگا۔ ان کا مقصد یہ ہے کہ کسانوں کو ان کی محنت کا پورا صلہ ملے اور انہیں کسی آڑھتی یا مڈل مین کے ہاتھوں بلیک میل نہ ہونا پڑے۔