بھارت کے ایک مسلم جوڑے کی درخواست پر ممبئی ہائی کورٹ نے کسی بھی مسلم مرد کی چار شادیوں کی رجسٹریشن اور میرج سرٹیفکیٹ جاری کرنے کا حکم دیا ہے۔

درخواست گزار جوڑے فروری 2023 میں شادی کی تھی۔ خاتون کا تعلق الجزائر سے ہے اور ان کا پاسپورٹ مئی میں ختم ہوچکا ہے۔

ممبئی ہائی کورٹ نے سماعت کے دوران کہا کہ جس شخص کی تیسری شادی کی رجسٹریشن سے انکار کیا جارہا ہے اس کی دوسری شادی کی رجسٹریشن تھانے میونسپل کارپوریشن نے کرلی تھی۔

عدالت کا کہنا تھا کہ بھارت کسی بھی مسلم مرد کو اپنی شریعت کے تحت چار شادیاں کرنے کی اجازت ہے اور اس سلسلے میں وہ مسلم پرسنل لا کا حوالہ بھی دے سکتا ہے۔

ممبئی ہائی کورٹ نے مقامی انتظامیہ کو حکم دیا ہے کہ جب تک شادی رجسٹر نہیں کرلی جاتی تب تک الجزائر کی خاتون کو پریشان نہ کیا جائے اور پاسپورٹ کی میعاد ختم ہونے کی بنیاد پر اُن کے خلاف کوئی کارروائی نہ کی جائے۔

ممبئی میونسپل کارپوریشن نے یہ کہتے ہوئے درخواست گزار جوڑے کی تیسری شادی کی رجسٹریشن سے انکار کردیا تھا کہ مہاراشٹر میرج ایکٹ کے تحت اس کی گنجائش نہیں۔ عدالت کا کہنا ہے کہ اس قانون کا مسلمانوں پر اطلاق نہیں ہوتا کیونکہ وہ اپنی شریعت کی طرف سے ملی ہوئی اجازت کے تحت چار شادیاں کرسکتے ہیں۔