جرمن پولیس نے داعش سے مبینہ تعلق کے حامل ایک شخص کو اسرائیلی سفارت خانے پر حملے کی منصوبہ بندی کے الزام میں گرفتار کیا ہے۔ اس شخص کو ملک کی اعلیٰ ترین عدالت دی فیڈرل کورٹ آف جسٹس میں پیش کیا گیا ہے۔

اسرائیلی سفارت خانے کے عملے نے بتایا کہ حملے کی منصوبہ بندی کی گئی تھی اور اس حوالے سے بعض مشکوک سرگرمیوں کی اطلاعات ملی تھی جس کے بعد پولیس کو اطلاع دی گئی۔

جرمن خبر رساں ادارے ڈی پی اے نے بتایا کہ پولیس نے اسرائیلی سفارت خانے کی فراہم کردہ معلومات کی روشنی میں برنو کے علاقے میں ایک اپارٹمنٹ پر چھاپہ مارا۔ برنو دارالحکومت برلن سے کچھ فاصلے پر واقع ہے۔

جرمنی میں اسرائیلی سفیر رون پروزور نے سفارت خانے کے عملے کی سلامتی یقینی بنانے کے لیے اقدامات کرنے پر جرمن پولیس اور حکومت کا شکریہ ادا کیا ہے۔ جرمن اخبار بلڈ نے بتایا ہے کہ اسی سلسلے میں جرمنی کے مغربی شہر سینکٹ آگسٹین میں بھی ایک اپارٹمنٹ پر چھاپہ مارا گیا۔

یاد رہے کہ ماہِ رواں کے اوائل میں ڈنمارک میں اسرائیلی سفارت خانے کو نشانہ بنایا گیا تھا۔ کوپن ہیگن میں اسرائیلی سفارت خانے کے باہر بم دھماکے ہوئے تھے۔ اس کے بعد پورے یورپ میں اسرائیلی سفارتی مشنز کی سیکیورٹی میں غیر معمولی اضافہ کردیا گیا تھا۔ بھارت سمیت کئی دوسرے ممالک میں بھی اسرائیلی سفارتی مشنز کی سیکیورٹی اپ گریڈ کردی گئی ہے۔