مولانا فضل الرحمان کی گزشتہ روز مانگی گئی ایک دن کی مہلت کے بعد آج قومی اسمبلی اور سینیٹ میں آئینی ترامیم پیش کئے جانے کا امکان ہے، اس حوالے سے قومی اسمبلی کے اجلاس کا 9 نکاتی معمول کا ایجنڈا جاری ہوگیا، جس کے مطابق قومی اسمبلی کا اجلاس شام 6 بجے منعقد ہوگا۔ تاہم، ایجنڈے میں چھبیسویں آئینی ترمیم جاری کردہ ایجنڈا میں شامل نہیں ہے۔ لیکن سینیٹ سیکرٹریٹ نے آئینی ترمیم کیلئے سپیلمنٹری ایجنڈا تیار کر لیا ہے۔

ذرائع کے مطابق آئینی ترمیم آج سپلیمنٹری ایجنڈا کے ذریعہ لائی جائے گی، اجلاس کے آغاز پر معمول کا ایجنڈا معطل کرنے کی تحریک منظور کی جائے گی۔

ذرائع کے مطابق دی لیگل ایڈ اینڈ جسٹس اتھارٹی ترمیمی بل پیش کیا جائے گا، جنرل سیلز ٹیکس کے بڑے پیمانے پر اکٹھا کرنے میں بے قاعدگیوں پر توجہ دلاو نوٹس شامل ہے۔

ایجنڈے میں وقفہ سوالات بھی موجود ہے۔ صدر کے مشترکہ اجلاس سے خطاب پر شکریہ کی تحریک، ریڈیو پاکستان کے ریٹائرڈ ملازمین کو پنشنری مراعات کی عدم ادائیگی پر توجہ دلاو نوٹس بھی ایجنڈے میں شامل ہے۔