پنجاب پولیس کے پی پی ایس سی کا امتحان نہ دے سکنے والے زائد العمرافسران کی عمر کی حد میں 5 سال کی رعایت دے دی گئی۔

ترجمان پنجاب پولیس کے مطابق سب انسپکٹرز اور اے ایس آئیز کی سیٹوں کے امتحان کیلئے عمر میں رعایت کی حد 35 سال سے بڑھا کر 40 سال کر دی گئی ہے۔

کرونا وبا و دیگرعوامل کی وجہ سے اوور ایج ہونے والے ہزاروں کانسٹیبلز اور ہیڈ کانسٹیبلز اس فیصلے سے مستفید ہونگے، جبکہ 1 ہزار سے زائد کانسٹیبلز اور ہیڈ کانسٹیبلز ایس آئی اور اے ایس آئی سیٹوں کیلئے کوالیفائی کر سکیں گے۔

راولپنڈی، منشیات فروشوں کی فائرنگ سے پولیس کانسٹیبل شہید

ترجمان کا کہنا تھا کہ کانسٹیبلری کی بڑی تعداد نے آئی جی پنجاب ڈاکٹر عثمان انور سے رابطہ کرکے مسئلہ کی نشاندہی کی تھی۔ آئی جی پنجاب نے متاثرہ پولیس ملازمین کو ریلیف دینے کے لئے سمری کیبنٹ کمیٹی کو ارسال کی۔

کیبنٹ کمیٹی کی منظوری کے بعد پی پی ایس سی امتحان کے لئے زائد العمر کانسٹیبلری کی عمر کی حد صرف ایک بار کے لئے 40 سال کر دی گئی۔ عمر کی حد میں رعایت کی یہ سہولت صرف اس بار ہونے والے پبلک سروس کمیشن امتحان کے لئے ہے۔

آئی جی پنجاب نے کہا کہ کانسٹیبلز، اے ایس آئی اور سب انسپکٹر بننے کے لئے مقابلے کے امتحان کے لئے تیاری کریں، امتحان جلد ہو گا۔