لاہور ہائیکورٹ نے مخصوص نشستوں کے فیصلے پر عملدرآمد کی متفرق درخواست مرکزی درخواست کے ساتھ سماعت کے لیے مقرر کرنے کی ہدایت کردی۔

لاہور ہائیکورٹ کے جسٹس راحیل کامران شیخ نے شہری منیر احمد کی درخواست پر سماعت کی۔

عدالت نے متفرق درخواست کو مرکزی درخواست کے ساتھ سماعت کے لیے مقرر کرنے کی ہدایت کرتے ہوئے سماعت 27 ستمبر تک ملتوی کر دی۔

درخواست میں موقف اختیار کیا گیا ہے کہ مخصوص نشستوں کے حوالے سے سپریم کورٹ کے 8 رکنی بینچ کا وضاحتی فیصلہ آچکا ہے، سپریم کورٹ کا تفصیلی بھی فیصلہ آچکا ہے، فیصلے پر تاحال عملدرآمد نہیں کیا گیا، چاروں صوبائی اسمبلی کے سپیکرز کو بھی مراسلہ جاری کر چکے ہیں، مخصوص نشستیں پاکستان تحریک انصاف کو تاحال نہیں ملی۔

درخواست گزار نے عدالت سے استدعا کی کہ پی ٹی آئی کو مخصوص نشستیں دینے اور مخصوص نشستوں کے فیصلے پر عملدرآمد کرانے کا حکم دیا جائے۔