انڈونیشیا میں 19 ماہ قبل اغوا کیے جانے والے نیوزی لینڈ کے پائلٹ فلپ مہرٹین کو اغوا کاروں نے رہا کردیا۔ نیوزی لینڈ کے وزیرِاعظم کرسٹوفر لَکسن نے اس پر اظہارِ تشکر کیا ہے۔

انڈونیشیا کے حکام نے بتایا ہے کہ فلپ مہرٹین کی صحت مجموعی طور پر اچھی ہے۔ اُس کا وزن تو کم ہوگیا ہے تاہم ذہنی حالت بالکل درست ہے۔ وہ ایک نارمل انسان کی حیثیت سے زندگی بسر کرنے میں کچھ خاص دشواری محسوس نہیں کرے گا۔

فلپ مہرٹین کو فروری 2023 میں انڈونیشیا کے علاقے پاپوا میں مسلح علیٰحدگی پسندوں نے اغوا کیا تھا۔ انڈونیشین پولیس نے بتایا کہ فلپ مہرٹین کو ایک مشترکہ ٹیم نے تیمیکا ریجنسی میں میڈیکل چیک اپ کے دوران علیٰحدگی پسندوں سے چُھڑوایا۔

انڈونیشین میٹرو ٹی وی نے فلپ مہرٹین کو اپنے اہلِ خانہ سے فون پر بات کرتے ہوئے دکھایا۔ اس گفتگو کے دوران فلپ مہرٹین روتا رہا۔ بعد میں اُس نے ایک پریس کانفرنس سے بھی خطاب کیا۔