خیبرپختونخوا کے دارالحکومت پشاور میں ریگی ماڈل ٹاؤن پولیس اسٹیشن پر دہشت گردوں نے حملہ کردیا۔

پولیس کے مطابق دہشت گردوں نے پولیس اسٹیشن کی طرف 2 راکٹ فائر کیے تاہم حملے میں کوئی جانی نقصان نہیں ہوا۔

پولیس کا کہنا ہے کہ ڈیوٹی پر مامور پولیس اہلکاروں نے بروقت جوابی کارروائی کرتے ہوئے دہشت گردوں کے حملے کو پسپا کردیا جبکہ حملہ آور موقع سے فرار ہوگئے۔

اطلاع ملتے ہی ایس پی ورسک ڈویژن مختیار علی بھاری پولیس نفری کے ہمراہ فوری موقع پر پہنچ گئے اور علاقے کو گھیرے میں لے کر سرچ آپریشن شروع کیا جو رات گئے تک جاری رہا۔

حملہ سے متعلق سی ٹی ڈی پولیس کو بھی مطلع کردیا گیا ہے اور رپورٹ درج کرکے مزید تفتیش کی جائے گی۔

واضح رہے کہ گزشتہ 24 گھنٹوں کے دوران باجوڑ کی تحصیل سالارزئی کے علاقے متہ شاہ میں بھی پولیس پوسٹ پر راکٹ سے حملہ کیا گیا تھا تاہم حملہ آور فرار ہونے میں کامیاب ہوگئے جبکہ حملے میں کسی قسم کا جانی نقصان نہیں ہوا تھا۔