بنگلہ دیش کی نئی عبوری حکومت نے ہندو برادری پر زور دیا ہے کہ وہ اذان اور نماز کے اوقات کار کے دوران درگا پوجا سے متعلق سرگرمیوں بالخصوص موسیقی سے گریز کریں۔

امور داخلہ کے مشیر لیفٹیننٹ جنرل (ر) محمد جہانگیر عالم چودھری نے کہا کہ پوجا کمیٹیوں سے کہا گیا ہے کہ وہ موسیقی کے آلات اور ساؤنڈ سسٹم کو بند رکھیں اور انہوں نے اس پر اتفاق کیا ہے۔

انہوں نے اپنے پیغام میں واضح کیا کہ نماز کی ادائیگی کے دوران اس طرح کی سرگرمیاں بند ہونے کی ضرورت ہے، اور اذان سے پانچ منٹ قبل وقفے پر عمل کرنا ہوگا۔

انہوں نے یہ اعلان ملک میں ہندو برادری کے سب سے بڑے مذہبی تہوار درگا پوجا سے قبل ملک میں امن و امان کی صورتحال پر ایک اجلاس کے بعد کیا۔

بنگلا دیش نے بھارت کو دُرگا پوجا میں درکار مچھلی کی سپلائی روک دی

ڈھاکہ ٹریبیون کی رپورٹ کے مطابق محمد جہانگیر نے یہ بھی کہا کہ رواں سال ملک بھر میں کل 32,666 پوجا منڈپ بنائے جائیں گے، ان میں سے 157 منڈپ ڈھاکہ ساؤتھ سٹی میں اور 88 نارتھ سٹی کارپوریشنز میں ہوں گے۔

جہانگیر عالم نے کہا کہ ہم نے پوجا منڈپوں پر چوبیس گھنٹے سیکیورٹی کو یقینی بنانے کے طریقہ پر تبادلہ خیال کیا ہے، بغیر کسی رکاوٹ کے پوجا منانے اور شرپسندوں کی شرپسند سرگرمیوں کو روکنے کے لیے اقدامات کیے جائیں گے۔