اسلام آباد کی احتساب عدالت نے توشہ خانہ ٹو کیس میں پاکستان تحریک انصاف (پی ٹی آئی) کے بانی چیئرمین عمران خان اور ان کی اہلیہ بشریٰ بی بی کو طلبی کا نوٹس جاری کرتے ہوئے دونوں کو 16 ستمبر کو پیش کرنے کا حکم دے دیا جبکہ عدالت نے توشہ خانہ ٹو کیس 16 ستمبر کو سماعت کے لیے مقرر کر دیا۔

احتساب عدالت سے توشہ خانہ ٹو کیس کا تمام ریکارڈ اسپیشل جج سینٹرل منتقل کردیا گیا۔ اسپیشل جج سینٹرل جج امجد اقبال آج رخصت پر ہیں، جس کے باعث ڈیوٹی جج ہمایوں دلاور نے کیس کی سماعت کی۔

سابق وزیراعظم عمران خان اور بشریٰ بی بی کے وکیل سلمان صفدر عدالت میں پیش ہوئے۔

وکیل سلمان صفدر نے کہا کہ میں کچھ گزارشات کرنا چاہتا ہوں، جس پر جج ہمایوں دلاور نے کہا کہ 16 ستمبر تک سماعت ملتوی کررہا ہوں۔

وکیل سلمان صفدر نے مزید کہا کہ مجھے اچھا لگتا اگر آپ میری گزارشات سن لیتے، ایک ہی طرح کا توشہ خانہ کیس ہے، ملزمان بھی وہی ہیں۔

جج ہمایوں دلاور نے کہا کہ مجھے دلچسپی ہی نہیں کیس میں، اسپیشل جج سینٹرل ون کا کیس ہے، میں سن نہیں سکتا 16 ستمبر کے لیے فکس کر رہا ہوں، میں عمران خان اور بشریٰ بی بی کو بھی نوٹس کررہا ہوں ان کو آئندہ سماعت پر پیش کریں۔

عدالت نے بانی پی ٹی آئی عمران خان اور بشریٰ بی کو طلبی کا نوٹس جاری کرتے ہوئے 16 ستمبر کو عدالت پیش کرنے کا حکم دے دیا۔

عدالت نے توشہ خانہ ٹو کیس 16 ستمبر کو اسپیشل جج سینٹرل کی عدالت میں سماعت کے لیے مقرر کردیا۔