مشیر اطلاعات خیبرپختونخوا بیرسٹر ڈاکٹر سیف نے کہا ہے کہ جعلی حکومت نے جمہوریت کا جنازہ دھوم دھام سے نکال دیا، جعلی حکومت کا ڈٹ کر مقابلہ کریں گے، کل رات جو کچھ ہوا وہ بدترین ڈکٹیٹر شپ میں بھی نہیں ہوا، دوسری جانب پاکستان تحریک انصاف کے سینئر رہنما اسد قیصر کا کہنا ہے کہ پولیس نے پارلیمنٹ پر حملہ اور پارلیمنٹرین کی گرفتاریاں کیں، کیا سب کچھ اسپیکر قومی اسمبلی کے حکم پر کیا گیا؟ جمہوریت پر جو حملہ ہوا، اس کا جواب دینا ہوگا ایسے رویوں سے گھبرانے والے نہیں۔

بیرسٹر سیف کا بیان

اپنے ایک بیان میں مشیر اطلاعات خیبرپختونخوا بیرسٹر سیف نے کہا کہ کل رات جعلی حکومت نے جمہوریت کا جنازہ بڑی دھوم دھام سے نکال دیا، جعلی حکومت جتنی بھی فسطائیت کرے پی ٹی آئی ڈٹ کر مقابلہ کرے گی، جعلی حکومت کی فسطائیت پی ٹی آئی رہنماوں اور کارکنوں کو مزید تقویت بخشتی ہے۔

بیرسٹر سیف نے کہا کہ اسلام آباد کے ایوانوں میں رات بھر لاقانونیت راج کرتی رہی، پارلیمنٹ پر شب خون مارکر بے توقیری کی گئی، پارلیمنٹ سے معزز اراکین کو اٹھاتے رہے جبکہ اسپیکر ہاتھوں پہ ہاتھ رکھ کر تماشا دیکھتے رہے، کل رات جوا ہوا وہ کبھی بدترین ڈکٹیٹرشپ میں بھی نہیں ہوا۔

بیرسٹر گوہر اور شیر افضل مروت سمیت اہم پی ٹی آئی رہنما گرفتار، پارٹی لیڈر شپ پارلیمنٹ ہاؤس میں جمع

پارلیمنٹ احاطہ سے اراکین کی گرفتاری پر اسپیکر کے ’ردعمل‘ کی تفصیلات سامنے آگئی

8 گھنٹے ’لاپتا‘ رہنے کے بعد علی امین گنڈا پور سے رابطہ بحال، پشاور پہنچنے کی تصدیق

انہوں نے مزید کہا کہ ہمارے معزز وکلاء اور اراکین پارلیمنٹ کو بے توقیری کے ساتھ اٹھایا گیا، ایک جلسے کی کامیابی سے بد حواسی کا یہ عالم ہے، بانی پی ٹی آئی عمران خان کی رہائی تک جدوجہد جاری رکھیں گے۔

اسد قیصر کا ویڈیو بیان

دوسری جانب پاکستان تحریک انصاف کے رہنماؤں کی گرفتاریوں کے خلاف اپنے ویڈیو بیان میں سابق اسپیکر قومی اسمبلی اسد قیصر نے کہا کہ پولیس نے پارلیمنٹ پر حملہ اور پارلیمنٹرین کی گرفتاریاں کیں، اسپیکر سے پوچھتا ہوں کہ کیا آپ نے اس کی اجازت دی؟ اسپیکر قومی اسمبلی کے حکم پر کیا یہ سب کچھ ہوا؟۔

اسد قیصر نے کہا کہ پارلیمنٹ اور رکن اسمبلی کی کوئی حیثت نہیں ہے، علی امین گنڈا پور کے ساتھ جو رویہ اپنایا گیا وہ قابل مذمت ہے، ایسے رویوں سے ہم گھبرانے والے نہیں۔

پی ٹی آئی کے سینئر رہنما نے بتایا کہ آج اجلاس میں آئندہ کے لائحہ عمل کا اعلان کریں گے، آپ ملک کو انارکی کی طرف لے کر جا رہے ہیں، شہباز شریف! آپ کے دن گنے جا چکے ہیں، جمہوریت پر جو حملہ ہوا، اس کا جواب دینا ہوگا۔