اپوزیشن لیڈرعمرایوب خان نے سنگجانی میں پی ٹی آئی کے جلسہ گاہ کا دورہ کیا اور دعویٰ کیا کہ پولیس نے جلسہ گاہ سامان لے جانے سے روک دیا ہے۔

انہوں نے میڈیا سے بات کرتے ہوئے کہا کہ جلسہ میں رکاوٹ ڈالنے کیلئے نئی جگہ کا این او سی جاری کیا گیا، ہمیں نئی جگہ سے کوئی مسئلہ نہیں۔

واضح رہے کہ عمر ایوب کا بیان ایسے وقت پر سامنے آیا ہے جب گزشتہ روز نجی ٹی وی کے مطابق علی امین گنڈاپور نے اسلام آباد انتظامیہ سے ٹیلی فون پر رابطہ کیا اور جلسہ گاہ کی تبدیلی کے حوالے سے آگاہ کیا جس پر ضلعی انتظامیہ نے جلسے کا مقام تبدیل کیا اور نیا نوٹی فکیشن (این او سی) جاری کردیا۔ جس کے مطابق 8 ستمبر کو تحریک انصاف کا جلسہ جی ٹی روڈ پر واقع مویشی منڈی کے پاس گراؤنڈ میں ہوگا۔

دوسری جانب پاکستان تحریک انصاف کی قیادت جلسہ گاہ ساؤنڈ سسٹم کے ہمراہ پہنچی تو پولیس نے سامان، ڈی جے سسٹم کو روکا جس پر پی ٹی آئی رہنماؤں اور پولیس اہلکاروں کے درمیان سخت جملوں کا تبادلہ ہوا۔

جس کے بعد پولیس اہلکار نے کہا کہ گاڑی جلسہ گاہ جانے کی اجازت نہیں ہے سامان کو ضبط کر کے گاڑی کو تھانے منتقل کیا جائے گا۔ وزیراعلیٰ خیبرپختونخوا کے بھائی فیصل امین گاڑی میں بیٹھ کر پولیس کے ہمراہ تھانے روانہ ہوگئے جبکہ علی امین گنڈا پور اُن سے مسلسل رابطے میں بھی رہے۔