خیبرپختونخوا کے شہر پشاور میں نامعلوم افراد نے مبینہ طور پر شوکت خانم اسپتال کے ڈاکٹر کو اغوا کرلیا جبکہ ڈاکٹر کے والد کی مدعیت میں مقدمہ درج کرلیا گیا۔

پولیس کے مطابق پشاور کے نواحی علاقے سربند اچینی روڈ سے شوکت خانم اسپتال کے ڈاکٹر کو نامعلوم افراد نے مبینہ طور پر اغوا کرلیا۔

پولیس کے مطابق ڈاکٹر صبح اپنی گاڑی میں ڈیوٹی کے لیے گھر سے نکلا تھا کہ 15 منٹ بعد اس کے والد کو کسی نے کال کی کہ آپ کے بیٹے کی گاڑی روڈ پر اسٹارٹ کھڑی ہے۔

پولیس کا کہنا ہے کہ ڈاکٹر کے والد کی مدعیت میں مقدمہ درج کیا گیا ہے، ایف آئی آر کے مطابق موقع پر پہنچ کر گاڑی اور بیٹے کا موبائل فون ملا۔

پولیس کا مزید کہنا ہے کہ سربند پولیس نے مغوی کی بازیابی کے لیے کوشش شروع کردی ہے۔