حکومت کی جانب سے یوٹیلیٹی اسٹورز کارپوریشن کی بندش کے خلاف کارپوریشن کے ملازمین نے احتجاج کا دائرہ کار وسیع کرتے ہوئے یوٹیلیٹی اسٹورز ہیڈ آفس کے سامنے سے ڈی چوک کی جانب مارچ شروع کردی۔

واضح رہے کہ سیکریٹری وزارت صنعت و پیداوار نے ملک میں تمام یوٹیلیٹی اسٹورز کو بند کرنے کا عندیہ دیا تھا۔ جس کے بعد یوٹیلٹی اسٹورز کارپوریشن کے ملازمین نے اسٹورز کی ممکنہ بندش کے خلاف احتجاج کی کال دی۔

ادھر احتجاجی مظاہرین نے کہا کہ اب ان کا دھرنا ڈی چوک میں ہوگا۔ واضح رہے کہ یوٹیلیٹی اسٹورز کارپوریشن ملازمین کا احتجاج آج تیسرا دن میں داخل ہوچکا ہے اور ان کا مطالبہ کہ کارپوریشن کی بندش کا فیصلہ واپس لیا جائے۔ خیال رہے کہ ملک بھر میں 4,000 سے زیادہ اسٹورز چل رہے ہیں جن کا مقصد عوام کو کم نرخوں پر بنیادی اشیا فراہم کرتا ہے تاہم وقفے وقفے سے کارپوریشن میں وسیع پیمانے پر کرپشن کی خبریں بھی منظر عام پر آتی رہیں۔

ملازمین کے ممکنہ احتجاج کے پیشِ نظر اسلام آباد انتظامیہ نے کنٹینرز رکھ کر ڈی چوک سیل کر دیا ہے۔ پی ڈبلیو ڈی کے ملازمین احتجاج کرتے ہوئے اسلام آباد کی مرکزی شاہراہ سری نگر ہائی وے پر آگئے اور ہائی وے پر ٹریفک کو بلاک کردیا۔

ملازمین کا موقف ہے کہ محکمے کو بند کرکے ملازمین کو بے روزگار کیا جا رہا ہے۔ ملازمین نے مطالبات کی منظوری تک احتجاج جاری رکھنے کا اعلان کر دیا۔