وزیراعلیٰ سندھ مراد علی شاہ نے ایران بس حادثہ میں شہدا اور زخمیوں کی مالی مددکا اعلان کرتے ہوئے فی شہید خاندان کو پچاس لاکھ روپے اور زخمیوں کیلئے فی افراد دس لاکھ روپے دینے کا فیصلہ کیا ہے۔

وزیراعلیٰ سندھ نے کہا ہے کہ حکومت سندھ نے چیئرمین پیپلز پارٹی بلاول بھٹو کی ہدایت پر شہداء کو واپس لانے کا مکمل انتظام کیا ہے جبکہ تمام انتظامات اور معاوضہ کے جاری ہونے کی رپورٹس چیئرمین بلاول بھٹو کو بروقت دی جائیں گی۔

قبل ازیں وزیراعلیٰ سندھ سید مراد علی شاہ کی ہدایت پر صوبائی وزیر ناصر حسین شاہ نے ایران بس حادثہ کے شہداء کو واپس لانے کیلئے تمام انتظامات مکمل کردئے ہیں۔

صوبائی وزیر نے بتایا کہ چیئرمین بلاول بھٹو کی درخواست پر وزیراعظم نے جہاز ایران سے میتوں اور زخمیوں کو واپس لانے کیلئے بھیجا ہے۔

ناصر شاہ نے شہداء کے ورثاء کو پیغام دیا کہ وزیراعلیٰ سندھ نے ایئر ایمبولینس اور دیگر ایمبولنسز کا انتظام سکھر اور جیکب آباد میں کردیا ہے،شہداء اور زخمیوں کے ورثا پریشان نہ ہوں۔