اسرائیلی فوج نے کہا کہ اس نے فلسطینی عسکریت پسندوں کے ساتھ لڑائی کے بعد غزہ کے جنوبی علاقے خان یونس میں ایک سرنگ سے 6 اسرائیلی مغویوں کی لاشیں نکال لی ہیں۔

اسرائیلی میڈیا کے مطابق انٹیلی جنس تجزیہ کے بعد لاشیں ان کے اہل خانہ کو سپرد کردی گئی ہیں، لاشیں پیر کی رات ایک سرنگ سے ملی تھیں۔

فوج نے کہا کہ آپریشن کے دوران فورسز نے تقریباً 10 میٹر گہرائی میں ایک سرنگ کی شافٹ برآمد کی جو زیر زمین سرنگ کے راستے کی طرف جاتی تھی جہاں یرغمالیوں کی لاشیں ملی تھیں۔

اسرائیلی حکام نے اس سے قبل کہا تھا کہ منگل کو جن مغویوں کی لاشیں برآمد ہوئی تھیں، ان میں سے کچھ جنوبی غزہ میں اسرائیلی فوج کی کارروائیوں کے دوران ہلاک ہو گئے۔

منگل کی رات ایک بیان میں فوجی ترجمان ریئر ایڈمرل ڈینیئل ہگاری نے کہا کہ چھ افراد اس وقت مارے گئے جب ہماری افواج خان یونس میں آپریشن کر رہی تھیں۔