پارلیمنٹ ہاؤس میں چوہوں کی بھرمار کے معاملے پر کیپٹل ڈیولپمنٹ اتھارٹی (سی ڈی اے) نے چوہے پکڑنے کے لیے انوکھا منصوبہ بنالیا۔

ذرائع کے مطابق سی ڈی اے نے چوہے پکڑنے کے لیے شکاری بلیوں کی خدمات لینے کا فیصلہ کیا ہے جس کے لیے 12 لاکھ روپے سے زائد کا بجٹ بھی مختص کیا گیا ہے۔

ذرائع نے بتایا کہ چوہے کھانے والی شکاری بلیوں کی خدمات لی جائیں گی اور چوہے پکڑنے کے لیے جالی لگی خصوصی کھڑکیاں بھی لگائی جائیں گی۔

ذرائع کا کہنا ہے کہ پارلیمنٹ ہاؤس کی چھتوں کی سیلنگ کی وجہ سے چوہوں کی بھرمار ہے، چوہے سینیٹ اور قومی اسمبلی کے مختلف شعبوں میں نقصان پہنچارہے ہیں جبکہ چوہوں نے پارلیمنٹ کے کئی دفاتر میں فائلیں بھی کتر دیں

اس حوالے سے ترجمان قومی اسمبلی نے کہا ہےکہ چوہوں کے خاتمے کے لیے کارروائی سی ڈی اے کرے گا، چوہوں کو پکڑنے کے لیے پورے سال کا بجٹ مختص کیا گیا ہے۔