سری لنکا کے خلاف ٹیسٹ سیریز سے قبل انگلینڈ کی ٹیم کو بڑا دھچکا لگ گیا، ٹیسٹ ٹیم کے کپتان بین اسٹوکس کی سریز میں شرکت مشکوک ہو گئی۔

دی 100 لیگ میں رن لینے کے دوران بین اسٹوکس زخمی ہوگئے، زخمی ہونے کے بعد اسٹریچر نہ ہونے کی وجہ سے بین اسٹوکس کو پیدل ہی چل کر گراؤنڈ سے باہر جانا پڑا۔

بین اسٹوکس کو فوری طور پر اسپتال منتقل کیا گیا جہاں ان کی چوٹ کا اندازہ لگایا جارہا ہے۔

مانچسٹر اورجنل کے خلاف ناردن سپر چارجرز کی جانب سے سنگل لیتے ہوئے بین اسٹوکس انجرڈ ہوئے، اب ان کی اسکین کے بعد ہی واضح صورتحال سامنے آسکے گی۔

واضح رہے کہ انگلینڈ اور سری لنکا کے درمیان 3 ٹیسٹ میچز کی سیریز کا پہلا میچ 21 اگست کو کھیلا جائے گا، پہلے ٹیسٹ میں اب کپتان کی شرکت مشکوک ہوگئی ہے۔