ریلویز پولیس راولپنڈی ڈویژن نے جعفر ایکسپریس کے ذریعے صوبہ پنجاب میں غیر ملکی اسلحہ کی اسمگلنگ کی کوشش ناکام بنادی۔

ریلویز پولیس راولپنڈی ڈویژن نے جعفر ایکسپریس کی بوگی میں چھپائے گئے اسلحے کی بھاری کھیپ برآمد کر لی تاہم کوئی گرفتاری عمل میں نہیں لائی جاسکی۔

ریلوے پولیس کو اطلاع ملی کہ جعفر ایکسپریس میں اسلحہ کی بھاری کھیپ موجود ہے جس پر پولیس نے چیکنگ شروع کر دی، چلتی ٹرین میں تلاشی کے دوران پٹرولنگ اہلکار ہیڈ کانسٹیبل شہزاد مہدی نے اٹک سٹی سے حسن ابدال کے درمیان بوگی نمبر 7 سے اسلحہ برآمد کر لیا۔

برآمد کیے گئے اسلحہ میں بریٹا برینڈ کے 6 پسٹل، 2 امپورٹڈ رائفلز، 12 میگزین اور 190 راؤنڈز شامل تھے۔

تھانہ ریلویز پولیس راولپنڈی میں مقدمہ درج کر لیا گیا ہے جبکہ ملزمان کی کھوج جاری ہے۔