پاکستان تحریک انصاف کے سیکرٹری جنرل عمر ایوب نے حکومت کو چیلنج کرتے ہوئے کہا ہے کہ الیکشن ترمیمی ایکٹ پی ٹی آئی کا راستہ روکنے کی بھونڈی کوشش ہے، الیکشن کسی بھی وقت ہو سکتے ہیں، روک سکتے ہو تو روک لو، الیکشن ترامیم کے خلاف عدالتوں میں جائیں گے اور امید ہے انصاف ہو گا۔

لاہور کی انسداد دہشت گردی عدالت میں میڈیا سے گفتگو کرتے ہوئے قومی اسمبلی میں اپوزیشن لیڈر عمر ایوب کا کہنا تھا کہ الیکشن کسی بھی وقت ہو سکتا ہے حکومت کے پاس پیسہ بھی ہے، حکومت کسی بھی طرح سے پی ٹی آئی کا راستہ نہیں روک سکتی۔

عمر ایوب نے کہا کہ میں کہتا ہوں روک سکتے ہو تو روک لو، یہ لوگ جتنی بھی کوشش کر لیں، کامیاب نہیں ہوں گے، ہماری سیٹیں ہمیں ملیں گی، وہ سیٹیں ہمیں آئین اور قانون دے گا۔

عمران خان نے پیغام دیا ہے عوام نئے الیکشن کی تیاری کرے، عمر ایوب

اپوزیشن لیڈر کا مزید کہنا تھا کہ جو ایکٹ پاس کیا گیا ہے وہ مکمل غلط اور منفی ہے، اس ایکٹ کو ہر جگہ چیلنج کریں گے، یہ قانون اور آئین کے بالکل منافی ہے، ہم لوگ الیکشن ترامیم کے خلاف عدالتوں میں جائیں گے، ہمیں امید ہے کہ ہمیں عدالتوں سے ریلیف ملے گا۔

انہوں نے کہا کہ اس ملک میں 500 ارب کا پیٹرول اسمگل ہوتا ہے، اسمگلنگ میں یہ حکومتی لوگ ملوث ہیں، کراچی، بلوچستان اور پنجاب کے حالات سب کے سامنے ہیں، اس حکومت کے ہاتھ میں کچھ نہیں ہے۔

عمران خان کا مشروط معافی کا اعلان مایوسی کی علامت ہے، ن لیگ

پی ٹی آئی کے سیکرٹری جنرل نے کہا کہ گوادر میں ماہ رنگ کا احتجاج بالکل درست ہے، خدارا آپ پختون لوگوں کی آواز سنیں، ملک کے اقتصادی حالات بہت سنجیدہ ہیں۔

انہوں نے کہا کہ صوابی کا جلسہ سب نے دیکھا ہے، ہمارے کسی کے ساتھ کوئی مذاکرات نہیں ہو رہے، ملک میں تازہ الیکشن ہمارا واحد مطالبہ ہے، ہمارا چرایا ہوا مینڈیٹ واپس کیا جائے، پاکستان نئے الیکشن کی طاقت رکھتا ہے۔

”فارم 47 والے وزیراعظم کو واننگ دیتا ہوں، ایجنسیز کے ذریعے دھمکیاں دلوانے سے باز رہو“، عمر ایوب خان

عمر ایوب کا مزید کہنا تھا کہ فنانس کا ایک طالب علم ہوتے بتا سکتا ہوں یہ بجٹ عوام دشمن ہے، اس سے مہنگائی مزید بڑھے گی، شہباز شریف، مریم نواز یہ سب لوگ کدھر بھاگیں گے؟ حسینہ واجد تو بھارت چلی گئی تھیں لیکن ادھر سے ہیلی کاپٹر نہیں جائے گا۔