ایشین انٹرنیٹ کولیشین (اے آئی سی) نے پاکستانی حکومت کی جانب سے ’پرسنل پروٹیکشن ڈیٹا بل‘ پر تحفظات کا اظہار کرتے ہوئے خبردار کیا ہے اگر یہ بل 2024 میں قانونی حیثیت اختیار کرگیا تو اس کے نتیجے میں معاشی ترقی کو سست رفتار کا سامنا ہوگا اور لاکھوں نوجوان بے روز گار ہوجائیں گے جبکہ آئند برس یعنی 2025 میں ملازمتوں کے مواقع میں 14.7 فیصد کمی ہوسکتی ہے جس کا مطلب ہوگا کہ ملک 16 ارب ڈالر سے محروم ہوجائے گا۔

اے آئی سی کی رپورٹ کے مطابق پرسنل پروٹیکشن ڈیٹا بل مزید بے روزگاری کا باعث بنے گا اور قرین امکان ہے کہ اس سے 32 لاکھ لوگ شعبہ ملازمت سے فارغ ہوجائیں۔ رپورٹ میں بتایا گیا کہ یہ بل غیرمعمولی تبدیلی کا باعث بنے گا۔

پرسنل ڈیٹا پروٹیکشن بل کے تحت تشکیل دیئے جانے والے کمیشن کو وسیع اختیارات حاصل ہوں گے کہ وہ محض ”عوامی مفاد“ یا ”پاکستان کی قومی سلامتی“ جیسی مبہم شرائط کی بنیاد پر ذاتی ڈیٹا کی منتقلی کی اجازت دینے سے انکار کر سکتا ہے۔ اسے ہم ڈیٹا لوکلائزیشن کہہ سکتے ہیں۔

رپورٹ میں اس بات پر روشنی ڈالی گئی ہے کہ ڈیٹا لوکلائزیشن سے کاروباروں اور اس کے نتیجے میں معیشت پر بھی اثرات مرتب ہو سکتے ہیں۔

رپورٹ میں کہا گیا کہ ڈیٹا لوکلائزیشن سے ہوسٹنگ کے اخراجات بڑھ سکتے ہیں۔ ایک آئی ٹی کمپنی نے ہوسٹنگ کے اخراجات میں 70 فیصد اضافے کا تخمینہ لگایا، جبکہ ایک ای کامرس پلیٹ فارم کے مطابق مالیاتی خدمات (سروسز) کے لیے مقامی طور پر مطابقت پذیر حل کی قیمت اس کے موجودہ کلاؤڈ بیسڈ حل سے تقریباً 10 گنا زیادہ ہوگی۔ موجودہ ماحول میں، ڈیٹا لوکلائزیشن کی ضرورت کے لیے درکار اعلیٰ لاگتیں چھوٹی اور درمیانی فرموں کو غیر متناسب طور پر متاثر کرنے کا امکان ہے۔

اس میں مزید کہا گیا ہے کہ ڈیٹا لوکلائزیشن سائبر سیکیورٹی کے خطرات کو بڑھا سکتی ہے، ایک ای کامرس خوردہ فروش نے مرکزی ڈیٹا اسٹوریج کے خطرات پر روشنی ڈالی، اس بات پر زور دیا کہ اس طرح کے نقطہ نظر سیکیورٹی فوائد سے سمجھوتہ کرتے ہیں۔ مزید ایک آئی ٹی کمپنی نے ڈیزاسٹر ریکوری اور ڈیٹا لوکلائزیشن کی ضروریات کے تحت ڈیٹا کی عکس بندی کے بارے میں خدشات کو اجاگر کیا۔