خیبر پختونخوا کے ضلع ڈیرہ اسماعیل خان میں اقوام متحدہ کے ادارے کی گاڑی پر نامعلوم افراد کی جانب سے فائرنگ کا واقعہ پیش آیا ہے۔

پولیس ذرائع کے مطابق گاڑی پر فائرنگ ڈیرہ اسماعیل خان میں ہتالہ پولیس اسٹیشن کی حدود میں ہوئی، جو پانی پر کام کرنے والے یو این ادارے کی گاڑی پر کی گئی، گاڑی پانی کے نمونے اکٹھا کرنے گئی تھی۔

ذرائع کا کہنا ہے کہ کچھ مسلح نامعلوم افراد پیسنجر گاڑیوں کو روک کر ان کی تلاشی لے رہے تھے، مشکوک افراد کو دیکھ کر یو این کی گاڑی میں موجود افراد نے گاڑی بھگا دی، جس پر ان مسلح افراد نے پیچھے سے فائرنگ کی، گولی گاڑی کے ٹائر پر لگی۔

یو این کی گاڑی پھٹۓ ہوئے ٹائر کے ساتھ ٹانک میں داخل ہوئی جہاں ٹانک پولیس نے انہیں ریسکیو کیا۔

پولیس ذرائع کا کہنا ہے کہ بلٹ پروف گاڑی میں سوار تمام اہلکار محفوظ رہے، تاہم، فائرنگ سے گاڑی کو معملی نقصان پہنچا۔

پولیس کا کہنا ہے کہ علاقے میں سرچ آپریشن جاری ہے۔