پنجاب کے شہر پتوکی کے نواحی گاؤں میں کرکٹ میچ کے دوران 2 گروپوں میں جھگڑے کے دوران ڈنڈوں، اینٹوں، مکوں اور بلوں کا آزادانہ استعمال ہوا، جس میں متعدد افراد زخمی ہوگئے۔

پتوکی کے نواحی گاؤں 22 چک رکن پورہ میں کرکٹ میچ کے دوران 2 گروپوں میں جھگڑا ہوگیا، جس کی ویڈیو وائرل ہوگئی۔

دونوں گروپوں میں جھگڑے کے دوران ڈنڈوں، اینٹوں، مکوں اور بلوں کا آزادانہ استعمال ہوا، جس کے نتیجے میں متعدد افراد زخمی ہوگئے۔

پتوکی کے تھانہ صدر پولیس نے واقعے پر محمد فاروق نامی شہری کی مدعیت میں 6 نامزد اور 10 نامعلوم ملزمان کے خلاف مقدمہ درج کرلیا۔

ایف آئی آر کے متن کے مطابق مدعی نے کہا کہ میچ کے دوران ملزمان نے میرے بیٹوں اور ان کے دوستوں کو زد و کوب کیا، بعدازاں ملزمان دیوار پھلانگ کر میرے گھر میں داخل ہوگئے اورکلہاڑی کے وار سے میرے بھائی کو شدید زخمی کر دیا۔

پولیس نے فوٹیج کی مدد سے متعدد افراد کو گرفتار کرلیا جبکہ پولیس کا کہنا ہے کہ واقعے کی مزید تحقیقات کی جا رہی ہیں۔