بین الاقوامی مالیاتی فنڈ نے گزشتہ روز پاکستان کے لیے 7 ارب ڈالر کے بیل آؤٹ پیکیج (قرضے) پر آمادگی ظاہر کی۔ یہ خبر پاکستان کے ساتھ ساتھ دنیا بھر کے میڈیا میں خوب چلی۔ آئی ایم ایف سے پاکستانی حکام کے مذاکرات 6 ماہ سے بھی زائد مدت تک جاری رہے۔

پاکستان کو 7 ارب ڈالر کا قرضہ دیا جارہا ہے جو 37 ماہ کے دوران اقساط کی شکل میں دیا جائے گا۔ اس خبر کو شائع کرتے وقت بھارت کے معروف جریدے انڈیا ٹوڈے کی ویب سائٹ نے شاندار جذباتیت کا مظاہرہ کیا۔

خبر کی سُرخی کے پہلے لفظ کے ذریعے پاکستان کی معاشی اور مالیاتی ابتری کا ذکر کرتے ہوئے ویب سائٹ نے لکھا کہ پاکستان کو 7 ملین (یعنی 70 لاکھ) ڈالر کا قرضہ دیا جارہا ہے۔ خبر بنانے والا پاکستان کی معاشی ابتری کا ذکر کرتے ہوئے ایسا جذباتی ہوا کہ 7 بلین (ارب) کو 7 ملین لکھ گیا۔ یہ خبر ہفتہ 13 جولائی کو دن کے سوا تین بجے شائع کی گئی تھی اور اب تک تصحیح نہیں کی گئی ہے۔