محکمہ انسداد دہشت گردی (سی ٹی ڈی) نے کراچی کے علاقے سہراب گوٹھ میں کارروائی کرتے ہوئے کالعدم تحریک طالبان پاکستان (ٹی ٹی پی) حافظ گل بہادر گروپ کے 2 دہشت گردوں کو گرفتار کر لیا۔

ڈی آئی جی سی ٹی ڈی آصف اعجاز شیخ کے مطابق اینٹی ٹیرا رزم فنانسنگ یونٹ سی ٹی ڈی نے سہراب گوٹھ، جنجال گوٹھ میں کارروائی کر کے 2 دہشت گردوں ابوذر اور یعقوب مسعود کو گرفتار کرلیا، ملزمان کا تعلق کالعدم تحریک طالبان پاکستان حافظ گلبہار گروپ سے ہے۔

آصف اعجاز شیخ کا کہنا تھا کہ گرفتار ملزمان سوشل میڈیا نیٹ ورک کے ذریعے افغانستان میں کالعدم ٹی ٹی پی قیادت سے رابطے میں تھے، گرفتار ملزمان تحریک طالبان پاکستان کے لیے فنڈز جمع کرتے تھے۔

ڈی آئی جی سی ٹی ڈی نے مزید بتایا کہ دونوں ملزمان کا تعلق وزیر ستان سے ہے، جو حال ہی میں فنڈنگ آپریشن کے لیے کراچی واپس آئے تھے، ملزمان کو سی ٹی ڈی شعبہ تفتیش اینٹی ٹیرارزم یونٹ نے گرفتار کیا۔

کراچی: بینک کیش وین کا گارڈ 60 لاکھ روپے سے بھرے تھیلے لے کر فرار

ڈی آئی جی سی ٹی ڈی کے مطابق گرفتار ملزمان کے قبضے سے فنڈنگ کی رقم بھی برآمد کرلی گئی، ملزمان کے خلاف سی ٹی ڈی میں مقدمہ درج کرلیا گیا جبکہ ملزمان سے مزید تفتیش کی جارہی ہے۔