حال ہی میں ایک دل دہلا دینے والا واقعہ پیش آیا جب ایک شخص تین دن تک گٹر لائن میں پھنسا رہا۔

غیر ملکی میڈیا رپورٹ کے مطابق میکسیکو سٹی کے شمال مغرب میں واقع شہر لیون میں ایک شخص نے تین دن گٹر لائن میں پھنسے گزار دیے۔

واقعہ کچھ یوں پیش آیا جب انتونیو نامی شہری سرنگوں کی تلاش میں قریبی ندی سے نکاسی آب کی بڑی لائنوں میں داخل ہوا اور آگے پہنچتے پہنچتے راستہ بھٹک گیا۔

انتونیو کی بہت کوششوں کے باجود اسے وہاں سے باہر نکلنے کا راستہ نہیں ملا، جہاں سے وہ لائنیوں میں داخل ہوا تھا وہاں تک نہ پہنچ سکا۔ انتونیو تین دن تک بھوکا پیاسا بھٹکتا رہا۔

بعد ازاں اسے ایک روشنی دکھائی دی جو اوپر کی سڑک کے ایک مین ہول کے ڈھکن کی جالیوں سے آرہی تھی۔

انتونیو ہر تھوڑی دیر کے بعد مدد کیلئے چیختا چلاتا رہا، بالآخر تیسرے دن سڑک سے گزرنے والی ایک خاتون نے اس کی چیخوں کی آواز سنی اور متعلقہ حکام کو اس کی اطلاع دی۔

راہ گیر خاتون کی اطلاع پر ریسکیو اہلکاروں نے فوری کارروائی کرتے ہوئے انتونیو کو بحفاظت گٹر لائن سے باہر نکال لیا تاہم بھوکا پیاسا رہنے کے باعث اس پر نقاہت طاری تھی جسے طبی امداد کی فراہمی کیلئے اسپتال منتقل کیا گیا۔