لاہور کے علاقے مناواں میں حاملہ خاتون کی پراسرار ہلاکت کا واقعہ پیش آیا ہے، متوفی خاتون کے خاوند نے اپنی ساس، سسر اور سالے کے خلاف مقدمہ درج کروا دیا۔

ابتدائی معلوماتی رپورٹ (ایف آئی آر) کے مطابق خاوند شہریار نے بتایا کہ میری بیوی قراة العین ڈھائی ماہ کی حاملہ تھی، جسے ام الخیر اور راشد سبحانی زبردستی گھر لے گئے۔

ایف آئی آر کے مطابق شوہر نے دعویٰ کیا کہ قراة العین کا حمل ضائع کروانے کی کوشش میں اسے نجی اسپتال میں قتل کردیا گیا۔

ایف آئی آر میں کہا گیا کہ ملزمان نے پوسٹ مارٹم اور خاوند کو اطلاع دئے بغیر تدفین کی کوشش کی۔ خاوند کی کال پر پولیس نے لاش کو قبضہ میں لے لیا۔

پولیس کا کہنا ہے کہ قراة العین کی لاش کا پوسٹ مارٹم کروا لیا گیا، رپورٹ آنے کے بعد حقائق واضح ہوں گے۔