جماعت اسلامی لاہور نے فیصل ٹاؤن گول چکر پر مہنگی اور طویل لوڈ شیڈنگ کے خلاف احتجاج کیا۔ جماعت اسلامی کے عہدیداروں، کارکنوں اور عوام نے بڑی تعداد میں اس احتجاج میں شرکت کی۔

نائب امیر جماعت اسلامی جنوبی لاہور احمد سلمان بلوچ نے احتجاج کی قیادت کی۔ مظاہرین سے خطاب میں ان کا کہنا تھا کہ جس حکومت کو عوام کے مینڈیٹ کی فکر ہو وہ سوچتی ہے کہ عوام خلاف نہ ہو جائیں۔ اِنہیں پتا ہے کہ پھر فارم 47 سے آجائیں گے۔

احمد سلمان بلوچ کا کہنا تھا کہ اس طرح تو حکومت نہیں چلے گی، سوال ہی پیدا نہیں ہوتا۔ عوام کے لیے ریلیف ہونا ہی چاہیے۔ محض ٹیکس تھوپ کر حکومت نہیں کی جاسکتی۔

احمد سلمان بلوچ نے کہا کہ جماعت اسلامی کو موقع ملے تو آئی پی پی پیز سے بات کرسکتے ہیں۔ تاجروں کے لیے ہمارے دھرنے کا پلیٹ فارم کُھلا ہے۔

ملک شاہد اسلم نے مظاہرین سے خطاب کرتے ہوئے کہا کہ اگرعوام خود باہر نکل آئے اور انتشار بڑھ گیا تو یہ لوگ کیا کریں گے۔

مظاہرین سے خطاب کرتے ہوئے اظہر بلال نے کہا کہ آئی ایم ایف کا سارا زور غریبوں پر چلتا ہے۔ وہ اہلِ ثروت کے لیے اقدامات تجویز کیوں نہیں کرتا؟