خیبر پختونخوا میں بجلی کے فیڈرز زبردستی آن کرنے کا سلسلہ جاری ہے۔ جن علاقوں میں بجلی کی بندش کا دورانیہ بہت زیادہ ہے اُن میں لوگ پاور اسٹیشن پر چڑھائی کرکے فیڈرز چالو کرانے کو ترجیح دے رہے ہیں۔

متعلقہ عملے کو ہراساں کرنے کے واقعات بڑھ رہے ہیں۔ عوام کے اشتعال سے بچنے کے لیے عملہ فیڈرز چالو کردیتا ہے۔

پشاور میں تحریک لبیک کے دلدارخان نے متنی گرڈ سے متنی فیڈر چالو کرالیا۔ پشاور الیکٹرسٹی سپلائی کمپنی کے رجمان کا کہنا ہے کہ متنی فیڈر پر لائن لاس کا تناسب 85.5 فیصد ہے۔

خیبر پختونخوا میں سیاست دانوں کی طرف سے مداخلت کے ذریعے بجلی کے فیڈر چالو کروانا اب چلن کا درجہ اختیار کرتا جارہا ہے۔ عوام بھی اِس راہ پر چل پڑے ہیں۔

دلہ زاک گرڈ اسٹیشن پر چڑھائی کرکے مظاہرین نے گولوزئی اور محمد زئی فیڈرز کو زبردستی چالو کرایا۔ گولوزئی فیڈر پر لائن لاس 80.7 فیصد جبکہ محمد زئی فیڈر پر لائن لاس 71.9 فیصد ہے۔