قطر کے شہر دوحہ میں پاکستان اور افغان عبوری حکومت کے درمیان ایک بار پھر باضابطہ رابطہ ہوا ہے۔

دوحہ میں پاکستان اور افغان عبوری حکومت کےدرمیان ایک بار پھر رابطہ ہوا، اقوام متحدہ کے زیراہتمام تیسری افغان کانفرنس میں شریک افغان وفد کی پاکستانی وفد سے ملاقات ہوئی، افغان وفد کی بھارتی وفد سے پہلے ہی دن ملاقات ہوگئی تھی۔

پاک افغان وفود کی ملاقات قطر میں پاکستانی سفیر ڈاکٹر محمد اعجاز کی رہائش گاہ پر ہوئی، جس میں پاکستانی وفد کے سربراہ آصف درانی، کابل میں پاکستانی ہیڈ آف مشن ایمبیسیڈر عبیدالرحمان نظامانی اور افغان طالبان حکومت کے ترجمان زبیح اللہ مجاہد موجود تھے۔

اس موقع پر پاکستانی سفیر ڈاکٹر محمد اعجاز نے افغان وفد کے اعزاز میں عشائیہ دیا۔

سعودی عرب افغانستان میں اپنا سفارتخانہ جلد کھولنا چاہتا ہے، ذبیح اللہ مجاہد

پاکستانی سفیر نے کہا کہ پاکستان اور افغانستان کے درمیان بہت کچھ مشترک ہے، امن کی خواہش دونوں اطراف موجود ہے۔

ذرائع کے مطابق دوحہ میں پاک افغان وفود کی ملاقات مثبت رہی، افغان وفد نے کانفرنس میں افغان موقف کی حمایت پر پاکستان کا شکریہ ادا کیا جبکہ افغان وفد نے پاکستانی حمایت کو عوامی سطح پر سراہا۔

پاکستانی وفد کے سربراہ آصف درانی نے کہا کہ افغان وفد کے ساتھ ملاقات میں دوحہ کانفرنس کے ساتھ ساتھ دو طرفہ تعلقات پر بھی تبادلہ خیال کیا گیا۔