اپوزیشن لیڈر پنجاب اسمبلی احمد خان بھچر نے پنجاب اسمبلی میں ضمنی بجٹ کے موقع پر نو مئی پر معافی مانگنے سے صاف انکار کرتے ہوئے کہا ہے کہ اگر ہم قصور وار ہیں تو سزا بھگتنے کے لیے تیار ہیں۔

اسمبلی اجلاس کے دوران احمد خان بھچرنے مطالبہ کیا کہ 9 مئی پر جوڈیشل کمیشن بنایا جائے، جب ہم 9 مئی کے جرم کا اقرار نہیں کرتے تو قصوروار کیوں ہیں۔

انہوں نے کہا کہ کیوں حمودالرحمن کمیشن ایک ایک بچہ پڑھ چکا ہے، حمود الرحمن کمیشن کو پڑھ ہی لیتے تو کوئی پریشانی نہ ہوتی۔

انہوں نے کہا کہ اگر سی سی ٹی وی کیمرے ہوتے تو نو مئی والا ظلم نہ ہوتا۔

اپوزیشن لیڈر نے ضمنی بجٹ پر گفتگو کرتے ہوئے کہا کہ بیوروکریسی کی نااہلی سے ضمنی بجٹ آتا ہے، 40 فیصد نوجوان تعلیم سے محروم ہیں، ضمنی بجٹ جیسے اللے تللے کوئی پسندیدہ اقدام نہیں ہے، سیپلیمنٹری بجٹ بیوروکریسی بناتی ہے اور 268 ارب روپے ان پرخرچ ہوتا ہے، جمہوری حکومت میں ضمنی بجٹ کو گناہ سمجھتا ہوں۔