تحریک انصاف کے اراکین پنجاب اسمبلی کے اجلاس کی اندرونی کہانی سامنے آگئی۔ ذرائع کا کہنا ہے کہ اراکین نے چیئرمین پی ٹی آئی بیرسٹر گوہر سے گلے شکوے کیے جب کہ بیرسٹر گوہر نے پارٹی رہنماؤں پر اظہار برہمی بھی کیا۔

لاہور میں اپوزیشن لیڈر پنجاب اسمبلی ملک احمد خان بچھر اور بیرسٹر گوہر کی زیر قیادت اجلاس ہوا۔ جس میں اراکین پنجاب اسمبلی، پی ٹی آئی رہنماؤں اور ٹکٹ ہولڈرز نے شرکت کی۔

وزیراعظم کا اپوزیشن سے مصافحہ، ’عمران خان کو مشکلات ہیں، تو آئیں بیٹھ کر بات کریں‘

ذرائع کے مطابق ایم پی ایز نے کہا کہ تحریک انصاف کی تمام کمیٹیوں میں صرف ایم این ایز کو شامل کیا جاتا ہے، جب کہ ایم پی ایز کو کسی کمیٹی میں شامل نہیں جاتا۔

’ہمیں بین الاقوامی عدالت سے رجوع کرنے پر مجبور نہ کیا جائے‘، پی ٹی آئی کا آپریشن عزم استحکام پر گرینڈ جرگہ

جس پر پارٹی چیئرمین بیرسٹر گوہر نے یقین دہانی کروائی کہ آئندہ تمام کمیٹیوں میں ایم پی ایز کو بھی شامل کیا جائے گا۔ انھوں نے کہا کہ آئندہ تمام فیصلوں میں اراکین پنجاب اسمبلی کو بھی اعتماد میں لیا جائے گا۔

بیرسٹر گوہر نے احتجاج نہ کرنے والے اراکین اسمبلی اور ٹکٹ ہولڈرز پر اظہار برہمی کیا۔ ان کا کہنا تھا کہ تمام ٹکٹ ہولڈرز اور ایم پی ایز باقاعدہ احتجاجی ریلیوں کا انعقاد کریں، صوبے میں ہر ہفتے احتجاج ریکارڈ کروایا جائے۔