آئی سی سی ٹی ٹوئنٹی ورلڈ کپ 2024 میں پاکستان نے اپنے آخری میچ میں آئرلینڈ کو 3 وکٹوں سے شکست دیدی۔ آئرلینڈ کی ٹیم نے مقرر 20 اوورز میں 9 وکٹوں کے نقصان 106 رنز بنائے۔ پاکستان نے آسان ہدف بھی 19ویں اوور میں حاصل کیا، آخری وقت میں بولرز نے چھکے لگا کرعزت بچائی۔

پاکستان ٹیم اپنی خراب پرفارمنس کی وجہ سے پہلے ہی ورلڈ کپ سے باہر ہو چکی ہے۔ گروپ اے میں پاکستان اور آئرلینڈ کے درمیان میچ فلوریڈا کے لارڈہل میں کھیلا گیا۔

ٹی ٹوئنٹی ورلڈکپ کے 36 ویں میچ میں پاکستان نے آئرلینڈ کے خلاف ٹاس جیت کر فیلڈنگ کا فیصلہ کیا۔ قومی ٹیم میں ایک تبدیلی کی گئی ہے اور نسیم شاہ کی جگہ عباس آفریدی کو ٹیم میں شامل کیا گیا ہے۔

آئرلینڈ کی اننگز

شاہین آفریدی نے پہلے ہی اوور میں صفر پر آئرلینڈ کے دو کھلاڑیوں کو آؤٹ کیا۔ اس کے بعد حریف ٹیم کی وکٹیں گرتی چلی گئیں تاہم ساتویں وکٹ پرگیرتھ ڈیلانے اور ایڈائر نے 44 رنز کی شراکت قائم کرکے کچھ مزاحمت کی۔

پاکستانی بولرز کے سامنے آئرلینڈ کی ٹیم اسکور بورڈ پر بڑا مجموعہ سجانے میں ناکام رہی اور مقرر 20 اوورز میں 9 وکٹوں کے نقصان 106 رنز بنا سکی۔ آئرلینڈ کی جانب سے گیرتھ ڈیلانے 31، اور جوس لٹل22 رنز بنا کر نمایاں رہے۔

قومی ٹیم کے فاسٹ بولر شاہین شاہ آفریدی اور اسپنر عماوسیم نے 3، 3 کھلاڑیوں کو آؤٹ کیا جب کہ محمد عامر نے 2 کھلاڑیوں کو پویلین کی راہ دکھائی ۔

پاکستان کی اننگز

107 رنز کے ہدف کے تعاقب میں قومی ٹیم نے ایک بار پھر محتاط آغاز کیا۔ 23 رنز پر پہلی وکٹ اس وقت گری جب صائم ایوب 17 رنز بنا کر آؤٹ ہوئے۔

قومی ٹیم کے دوسرے آؤٹ ہونے والے بلے باز محمد رضوان تھے، انھوں نے بھی 17 رنز اسکور کیے، جب کہ فخر زمان 5 اور عثمان خان 2 رنز بنا کر آؤٹ ہوئے۔

پاکستان کی پانچویں وکٹ اس وقت گری جب شاداب خان صفر پر پویلین لوٹ گئے، جبکہ عماد وسیم بھی محض 4 رنز بناکر آوٹ ہوئے۔

95 کے مجموعے پر قومی ٹیم کی ساتویں وکٹ اس وقت گری جب عباس آفریدی 17 رنز بناکر آؤٹ ہوئے، میچ کے آخری لمحات میں انھوں نے ایک چھکا اور ایک چوکا بھی لگایا۔ جب کہ شاہین آفریدی نے 2 چھکوں کی مدد سے 5 گیندوں پر 13 رنز بنائے اور آؤٹ نہیں ہوئے۔

خیال رہے کہ پاکستان اور آئرلینڈ کا میچ محض رسمی کارروائی تھی کیونکہ اب دونوں میں سے کسی ٹیم کا ایونٹ میں آگے بڑھنے کا کوئی امکان نہیں ہے۔

بھارت تین میچ جیتنے اور ایک چھوڑنے کے بعد سات پوائنٹس کے ساتھ ورلڈ کپ کے سپر ایٹ مرحلے کے لیے کوالیفائی کر چکا ہے۔

گروپ اے سے 2007 کی چیمپئنز میں شامل ہونے والی دوسری ٹیم امریکہ ہے جس نے 6 جون کو پاکستان کو سپر اوور کے سنسنی خیز مقابلے میں شکست دے کر دنیا کو چونکا دیا تھا۔

اس کے بعد بابر اعظم کی ٹیم 9 جون کو نیویارک میں بھارت کے خلاف کم اسکور کرکے چھ رنز سے شکست کھا گئی، جس نے پاکستان میں سوشل میڈیا پر ہنگامہ کھڑا کردیا۔

پاکستان میں کرکٹ شائقین نے ٹیم کی خراب بیٹنگ کارکردگی پر افسوس کا اظہار کیا جو 120 رنز کے ہدف کے تعاقب میں ناکام رہی۔

پاکستان، جس نے ٹورنامنٹ میں اب تک صرف کینیڈا کو شکست دی ہے، جمعے کو یو ایس اے اور آئرلینڈ کا میچ بارش کی وجہ سے نہ ہونے کے باعث کوالیفائی کرنے کا موقع گنوا بیٹھا۔

ہفتہ کو میچ سے پہلے کی ایک کانفرنس سے خطاب کرتے ہوئے، پاکستانی آل راؤنڈر عماد وسیم نے تسلیم کیا کہ ورلڈ کپ سے پہلے راؤنڈ میں باہر ہونے کے بعد گرین شرٹس اپنے سب سے کم پوائنٹ پر ہیں۔

یہ پوچھے جانے پر کہ کونسی بڑی تبدیلیوں کی ضرورت ہے، 35 سالہ بائیں ہاتھ کے اسپنر نے کہا کہ یہ واضح ہے کہ بنیادی تبدیلیوں کی ضرورت ہے۔

انہوں نے کہا کہ ’یہ میرا ڈومین نہیں ہے لیکن میں سمجھتا ہوں کہ تبدیلیاں ہونی چاہئیں اور ایک زبردست تبدیلی ہونی چاہیے تاکہ ہم آگے بڑھ سکیں‘۔

اس ٹورنامنٹ کے لیے مختصر ریٹائرمنٹ کے بعد واپس آنے والے وسیم نے کہا کہ تبدیلی دور رس ہونے کی ضرورت ہے۔