وزارت ہوا بازی نے اس واقعے کی تحقیقات کا حکم دیا ہے جس میں ایئرپورٹ سیکیورٹی فورس (اے ایس ایف) کے عملے نے شک کی بنا پر ایک خاتون حاجی کے بال کاٹ دیے تھے۔

ڈان اخبار کی رپورٹ کے مطابق ایوی ایشن ڈویژن نے اسلام آباد سے جاری ایک حکم نامے کے ذریعے کیس کی تحقیقات اور حقائق کا پتہ لگانے کے لیے ایک بورڈ آف انکوائری تشکیل دیا۔

اس میں کہا گیا ہے کہ “یکم جون 2024 کو ایک واقعہ رپورٹ کیا گیا، جہاں اے ایس ایف کے اہلکاروں نے جناح انٹرنیشنل ایئرپورٹ کراچی پر بین الاقوامی روانگی کے دوران تلاشی پر سیما بانو اور ان کے شوہر محمد شفیع احمد پر مشتمل ایک فیملی کو روکا جو ایس وی 701 میں سفر کرنے والے تھے۔

اس میں کہا گیا ہے کہ جب اینٹی نارکوٹکس فورس نے سیما بانو کو کلیئر کیا تھا، اے ایس ایف کے عملے نے شک کی بنیاد پر ان کے بال کاٹ دیے۔

آرڈر میں کہا گیا کہ “اسکیننگ کے بعد، انہیں سوار ہونے کے لیے اجازت دے دی گئی لیکن واقعے کے حقائق جاننے اور ذمہ داری کا تعین کرنے کے لیے معاملے کی انکوائری کی جائے۔

حکم نامے میں کہا گیا کہ ایوی ایشن سیکرٹری نے 4 رکنی بورڈ آف انکوائری تشکیل دی ہے۔