اسلام آباد ہائی کورٹ نے عمران خان اور بشریٰ بی بی کے خلاف نئی تحقیقات پر نیب سے جواب طلب کرلیا۔

بانی پی ٹی آئی اور بشرٰی بی بی نے توشہ خانہ کیس میں نیب کی نئی نیب انکوائری کے خلاف درخواست دائر کی تھی۔

چیف جسٹس عامر فاروق اورجسٹس طارق محمود جہانگیری نے سماعت کی۔ بانی پی ٹی آئی اور بشریٰ بی بی کے وکیل سلمان صفدر پیش ہوئے۔

ان کا موقف تھا کہ اس کیس میں سزا سنائی جاچکی ہے اور میاں بیوی پر اڈیالہ جیل میں ایک ٹرائل چل رہا ہے۔

بانی پی ٹی آئی اور ان کی اہلیہ کے وکیل کا استدلال تھا کہ جس ریفرنس میں کال اپ نوٹس آیا ہے اس میں وہ پہلے ہی گرفتار ہیں۔ نیب کو کسی بھی قسم کے ایکشن سے روکا جائے۔

چیف جسٹس کا کہنا تھا کہ یہ کال اپ نوٹس پہلے سے غیر موثر ہے۔ اسلام آباد ہائی کورٹ نے قومی احتساب بیورو کو نوٹس جاری کرتے ہوئے سماعت اگلے ہفتے تک ملتوی کردی۔