وفاقی کابینہ نے وزارت ہوا بازی کی سفارش پر ایئر سیال کو انٹرنیشنل فلائٹ آپریشنز شروع کرنے کی منظوری دے دی۔

وزیراعظم شہبازشریف کی زیرصدارت وفاقی کابینہ کا اجلاس ہوا، وزیراعظم نے سعودی سرمایہ کاروفد کی پاکستان آمد کو معاشی تعلقات کے لیے انتہائی اہم پیشرفت قرار دیتے ہوئے وفاقی وزراء، افسران اور اسٹاف کی کارکردگی کو سراہا۔

وفاقی کابینہ نے وزارت ہوا بازی کی سفارش پر ایئر سیال کو چین، ملائشیا، سری لنکا، تھائی لینڈ، ترکیہ، برطانیہ اور کویت میں فلائیٹ آپریشنز شروع کرنے کی منظوری دی جبکہ یہ منظوری نیشنل ایوی ایشن پالیسی 2023 اور ایئر سروسز ایگریمنٹ کے تحت دی گئی۔

وفاقی کابینہ اجلاس شروع، گندم درآمدی اسکینڈل کی تحقیقات کا جائزہ لیا جا رہا ہے

وفاقی کابینہ نے وزارت تجارت کی سفارش پر اسلامی جمہوریہ پاکستان اور کنگڈم آف کولمبیا کے درمیان مشترکہ تجارتی کمیٹی کے قیام حوالے سے مفاہمتی یادداشت پر دستخط کی منظوری دے دی۔

وفاقی کابینہ نے وزارت وفاقی تعلیم و فنی تربیت کی سفارش پر ڈائیریکٹوریٹ جنرل آف اسپیشل ایجوکیشن کو وفاقی وزارت انسانی حقوق سے وزارت وفاقی تعلیم و فنی تربیت کے حوالے کرنے کی بھی منظوری دے دی۔

اس کے علاوہ وفاقی کابینہ نے کابینہ کمیٹی برائے چینی سرمایہ کاری منصوبہ جات کی 30 اپریل 2024 کو ہوئے اجلاس میں کئے گئے فیصلوں کی توثیق کر دی۔