سعودی سیکیورٹی حکام نے گزشتہ ایک ہفتے کے دوران ملک بھر سے رہائش، ملازمت اور سرحدی ضوابط کی خلاف ورزی پر 19 ہزارافراد کو گرفتار کرلیا۔

گلف نیوز کی رپورٹ کے مطابق وزارت داخلہ نے مملکت کے تمام خطوں میں خلاف ورزی کرنے والوں کو نشاندہی کے بعد گرفتار کیا۔

مزید پڑھیں سعودی عرب میں فائرنگ سے خاتون سمیت 2 افراد قتل

حکام کے مطابق حراست میں لیے گئے افراد میں سے 11 ہزار 987 افراد رہائشی قوانین کی خلاف ورزی کرتے ہوئے پائے گئےجبکہ 4 ہزار 367 کو بارڈر سیکیورٹی کی خلاف ورزیوں میں ملوث پایا گیا۔

علاوہ ازیں 2 ہزار 696 افراد کو لیبر قوانین کی خلاف ورزیوں پر گرفتار کیا گیا۔ مزید برآں سیکیورٹی اہلکاروں نے مملکت میں غیر قانونی طور پر داخل ہونے کی کوشش کرنے والے ایک ہزار 11 افراد کو روکا۔

حکام کے مطابق ان افراد میں اکثریت ایتھوپیا اور یمن سے تعلق رکھنے والوں کی تھی جو بالرتیب 61 فیصد اور 36 فیصد تھی۔